Barangay disaster team subling gipalihok sa Talisay
CEBU, Philippines — Subling gipalihok ang Barangay Disaster Team sa Dakbayan sa Talisay aron sa pagpangandam sa ting-uwan.
Kini nonot usab sa unang bagyo nga nisulod sa Philippine Area of Responsibility (PAR) nga ginganlan og Aghon nga nakamugna og pag uwan sa mga lugar sa kabisay-an ingon man dinhi sa Sugbo.
Si Alvin Santillana, pangu sa City Disaster Risk Reduction and Management Office (CDRRMO) niingon nga bisan paman og dili direkta nga maigo ang ilang dapit mas maayo nga mangandam lang sila daan.
Gipahimangnoan ang mga nagpuyo daplin sa kasapaan ug coastal barangay nga alerto panahon nga motumaw ang uwan.
Di sab angay mokumpyansa ang nagpuyo sa bukirang barangay nonot sa posible nga pagtumaw sa landslide.
Matud pa ni kapitan Edward Alesna sa Poblacion nga giandam nila ang generator, pisi ug uban pang kagamitan nga magamit panahon sa emerhensya.
Ang mga mananagat sa Barangay Poblacion ang nipasaka sab sa ilang sakayan sa taas nga lugar nonot sa posibleng pagkusog sa balud.
Samtang naka-hightened alert sab ang kapolisan nga andam motabang kung adunay magkinahanglan og tabang. (CEBU NEWS)
- Latest
