Kasungian tali sa siyudad ug sa CPA mahilot na kaha?

CEBU, Philippines — May gamay nga kahayag nga nakita aning kasungian tali sa Cebu City Hall ug sa Cebu Ports Authority (CPA)  ug gilaumang maghatag kini og dalan aron mapadayon ang pag-umad ug pagpalambo diha sa bakanteng luna sa atubangang bahin sa Cebu City Hall padung sa dagat.

Sa maong luna nahimutang ang dugay na kaayong gilalisan nga karaang building sa Campania Maritima, apil na ang dugay na kaayong nadelatar nga pag-abli sa Puso Village soon.

Kini human si acting Cebu City Mayor Raymond Garcia nakigtagbo sa mga opisyales sa CPA officials pinangulohan sa ilang General Manager nga si Francisco Comendador III niadtong Biyernes sa hapon ug giestoryahan ang mga plano mahitungod aning gilalisan.

Sayo sa miaging tuig,  mihatag og privilege speech si Garcia diin iyang gipadayag ang kasagmuyo bahin sa hinayhinay na sab pagbalik sa gubaon nga  hitsura sa Compañia Maritima human gipakgang sa CPA ang pag-ugmad sa maong edipisyo kay giangkon nila nga ilaha kini.

Si Garcia kinsa usa ka abogado miingon nga wala nila tukia ang merito sa natanggong nga kaso mahitungod sa Compañia Maritima, kondili ang kung unsa sa iyang tan-aw ug nahibaw-an isip chairman sa Cebu City Historical and Cultural Affairs Commission ug sa Waterfront Development Commission.

Giangkon ni Garcia nga daw hinayhinay napapas ang iyang paglaum para unta sa pagpanindot ug pagugmad na sa maong dapit nga gituohan niyang makatabang sa siyudad.

Sayo ning tuiga, nakadawat og pasalig si Mayor Mike Rama gikan kang Transportation Secretary Jaime Bautista bahin sa pagugmad sa Campania Maritima ug sa maong luna atol sa pag-abli sa Plaza sa Katawhan.

Apan bisan pa niini, migrabe hinuon ang kasungian tali sa siyudad ug sa CPA ilabi na sa dihang ang Office of the Building Official (OBO) pugsanong mipatuman sa cease and desist order sa gitukod nga extension sa pantalan sa CPA kay way mga permit.

Tungod sab niini si Governor Gwendolyn Garcia miapil sab ug mipadayag og suporta sa CPA kay matud pa mas daghan ang makabenepisyo sa pantalan. Niabot sab kining preventive suspension batok ni Rama.

Si acting mayor Garcia pinalahi ang paagi, gusto niyang ipaagi sa diplomasya ang CPA ug sa laing nakasungiay ni Rama nga mao ang Metropolitan Cebu Water District.

Ang konseho mihatag og pagtugot kang Garcia nga makaestorya si Comendador aron tukion ang Puso Village, Compania Maritima, ug ang mechanical parking.

 “Mao na ni. This is the start of the collaboration, cooperation, coordination between the City of Cebu and the Cebu Port Authority,” excited nga pulong ni acting mayor Garcia.

Sa post sa CPA, si Comendador kauban silang CPA Commissioners Engr. Allan G. Alfon, Atty. Joselito O. Pedaria ug Atty. Leo B. Cañares, nagpasalamat sa imbitasyon ni Garcia.

Matud niya ang ilang pagtambong nagpakita sa ilang intensiyon para sa kahapsay ug kahiusahan sa Sugbu.

“Kini among pag-anhi, nagpamatuod ni nga sukad pa sa sinugdanan, gusto jud mi og kalinaw unya panaghiusa sa atong One Cebu,” Comendador said.

“Hopefully, nga pinaagi niining sinugdanan nga panag-estorya, pagbisita sa maong mga lugar, makab-ot nato ang kalinaw,” dugang pa ni Comendador.

Ang CPA nagpaabot nga dunay “proposal” gikan sa City Government ug kun kini mapinalisar ila kining ipresentar sa CPA Governing Board, sa Cebu Port Commission aron ma- review ug approval.

Si acting mayor Garcia miingon nga posibleng adunay Memorandum of Understanding (MOU), Memorandum of Agreement (MOA), o Compromise Agreement nga pandayon para niini. Si Garcia ug Comendador magkinahanglan og otorisasyon  sa Cebu City Council ug CPA Board ug mapirmahan kini sa ikaduhang semana sa bulan sa Hunyo.

Ini og human niini isumitir kini ngadto sa korte aron aprubahan kay sa pagkakaron ang maong luna ubos sa hurisdiksyon sa korte tungod sa kaso.

“Pero I can see this happening in maybe three months — the entire thing will be operational already,” matud pang Garcia.—Gikan sa The Freeman/IBM