Opisyal sa kapolisan nakapusil
Gikustodiya karon sa Pamplona Police Station sa Negros Oriental Police Provincial Office ang usa ka polis nga nag-ranggo og Police Major nga padung na untang moretiro sa serbisyo human kini boluntaryong mitahan sa iyang kaugalingon kay matud pa nakapusil kini og tawo diha sa Barangay Balayong, Lungsod sa Pamplona, Probinsiya sa Negros Oriental pasado alas 5 sa hapon sa adlaw’ng Biyernes, Mayo 24, 2024.
Ang maong Police Major, nag-edad og 50 anyos ug nagpuyo kini sa Lungsod sa San Jose sakop gihapon sa Negros Oriental samtang ang biktima mao si alyas Ricky, hingkod ang panuigon ug nagpuyo sa Barangay Balayong, Pamplona.
Nasayran nga non-duty status na ang maong opisyal kay nagpaabot nalang kini sa iya opisyal nga pagretiro. Gibutang siya karon sa Regional Police Holding Unit.
Nagkanayon ang Public Information Officer sa Negros Oriental Police Provincial Office (NOPPO) Lieutenant Stephen Polinar nga anang adlawa sa wala pa nahitabo ang pagpamusil, giimbitar ang suspetsado sa usa ka opisyal sa gobiyerno diha sa ilang lugar kay pista.
Matud pa didto nag-abot ang maong polis ug ang biktima. Ang naulahi gikataho nga nakainom na ug gialegar nga nagsige og pasingit sa maong polis ug gikatahong gisuwayan pa gyud kini sa pagdunggab gamit ang gidaladalang hunting knife.
Tungod niini, giunhan pagpusil sa maong polis ang biktima.
Giklaro hinoon ni Lt. Polinar nga kuhaon pa sab nila ang habig sa biktima aron mahibaw-an gyud kung unsa gyuy nahitabo ug sutaon kun duna bay karaang gikabikilan ang duha.
“Kana ginalantaw pa nato na if there is a history sa ilaha, if naay long standing nga mga fueds or naay pambikil nga nahitabo in the past nga nag-prompt aning victim nga mag-abot sila didto sa suspect, under investigation pana nato karon actually ganehang morning nagtawag ko sa Pamplona they are still proceeding to the hospital diri sa Dumaguete to interview, to take the side of the victim on this matter,” matud ni Polinar.
Nagpaalim karon ang biktima sa tambalanan human makaangkon og samad pinusilan samtang ang suspetsado posibleng mag-atubang og kasong frustrated homicide. (BANAT NEWS)
- Latest
