Obispo nangaliya og uwan, P8.3 milyong danyos sa agrikultura sa Talisay

MANILA, Philippines — Obispo sa Diocese of Talibon Bishop Patrick Daniel Parcon, D.D nangaliya og ulan atol sa wali niini subay sa kapistahan ni St. Isidore the Farmer Parish nga nahimutang sa Barangay Abachanan, Sierra Bullones, Probinsiya sa Bohol kagahapon.

Si Parcon, sa iyang homily mapasalamaton sa tanang katawhan nga sa unang higayon nakapahigayon na sa Santos nga Misa sulod sa padayon nga gitrabaho nga simbahan sa maong dapit sa Barangay Abachanan ug natukod kini pinaagi sa kamangihatagon sa tanang katawhan.

Matud ni Parcon nga iyaha usab nga gipangaliya atol sa kapistahan ni San Isidro nga hatagan ug buboan og ulan ang maong dapit aron makapadayon sa pagtikad sa ilang mga uma ug padayon sila nga nangaliya niini. Nasayran nga kasagarang panginabuhian sa maong dapit mao pag-uma.

Si Parcon nidasig usab sa mga magtutuo nga padayon gihapon sa ilang kamadasigon sa pagtabang alang sa kahumanan sa hingpit sa simbahan.

Ang Sierra Bullones, bisan pa og daghan sila og tinubdan sa tubig nakibhangan gihapon tungod sa nasinati nga grabeng kainit sa panahon tungod sa El Niño.

Sa laing bahin, nikabat sa P8.3 milyones ang danyos nga namugna sa huwaw ngadto sa produkto sa agrikultura sa Dakbayan sa Talisay.

Kini base sa talaan gikan sa buhatan sa agrikultura sa siyudad sugod niadtong buwan sa Enero hangtud sa Abril niining tuiga.

Si Konsehal Alito Bacaltos, chairman sa committee on agriculture sa siyudad nagkanayon nga ang danyos nilangkub sa P2.6milyones nga balor sa apektadong upland vegetables; P973,000 alang sa lowland vegetables; P1.1milyon sa spices; P1.4milyon sa prutas; P2 milyones sa commercial crops ug P110,000 sa livestock. (BANAT NEWS)