Nanghinol og 15-anyos sa bus, gipadakop

CEBU, Philippines — Nagtingkagol karon sa prisuhan ang usa ka 25 anyos nga lalake human gipadakop kay matud pa naghinol og paa ug dughan sa usa ka 15-anyos nga dalagita sulod sa Ceres bus pasado alas-5 sa hapon niadtong Lunes, Mayo 20, 2024 diha sa Barangay Tina-an, Dakbayan sa Naga.

Ang biktima usa ka 15-anyos Grade 10 student nga taga Lungsod sa Dalaguete samtang ang suspek usa ka 25 anyos nga lalake nga nagpuyo sa Barangay Labangon, siyudad sa Sugbo.

Sa imbestigasyon sa Naga City Police Station nahibaw-an nga ang biktima gikan sa Lungsod sa Dalaguete misakay  sa bus paingon sa siyudad sa Sugbo samtang suspetsado nisakay sab gikan sa dakbayan sa Carcar.

Apan pag-abot sa Barangay Tina-an, sa Dakbayan sa Naga giingong kalit lang nanghikap ang suspetsado sa paa ug dughan sa biktima. Gumikan sa hitabo ang biktima misumbong sa drayber ug konduktor bus.

Ang driver mihunong sa border control sa Naga City Police Station ug nangayo og tabang hinungdan sa pagdakop sa suspek.

Gipasakaan na og kasong Acts of Lasciviousness in relation to Republic Act 7610 ang suspetsado ug dunay girekomendar nga piyansa nga P180,000. --  IBM BANAT NEWS