Cebu City nagkuwang og MRF

CEBU, Philippines — Ang kakulang sa Material Recovery Facilities sa Siyudad sa Sugbo ang nakadugang sa problema sa pagdaghan sa mga basura sama sa plastik nga gipanglabay diha sa mga sapa ug kanal.

Apan ang konseho sa siyudad pinaagi sa ilang committee on public service padayong naglihok karon aron matubag ang maong problema pinaagi sa pagbutang sa maong facilities nga adunay mga policy nga nag-promote og disiplina sa mga residente sa siyudad.

Si Konsehal Phillip Zafra, nibutyag nga ang iyang komitiba nagtrabaho karon aron maka-develop og mga policy nga magbutang og MRF pinaagi sa pag-cluster sa mga barangay.

Ang strategy gitinguha nga magsugod sa napulo ka barangay cluster ngadto sa lima ka barangay hangtud sa tulo ka cluster ug moabot na unya ngadto sa matag barangay nga makabaton og kaugalingong MRF.

Tinguha usab ni Zafra nga maabot sa sitio level ang MRF apan kinahanglan nga adunay incentives aron makapaenganyo sa katawhan.

Nakitang hagit ni Zafra ang kagamay sa lugar sa kabarangayan diin maglisod og establisar og MRF ug adunay pipil ka mga residente duol sa MRF ang nireklamo tungod sa baho sa basura. (BANAT NEWS)