Cordova-Lapu-Lapu City Bridge gilaomang makaloag sa trapiko

CEBU, Philippines — Nikabat ngadto sa P100 milyones ang gigahin nga pundo alang sa tukoron nga Cordova-Lapu-Lapu City Bridge project.

Kini ang gibutyag ni Kongresista Cindi King-Chan diin ang maong pundo naggikan sa iyang buhatan ug ang nahisgutang proyekto usa sa iyang prayoridad.

Niining ulahi lang gipahigayon ang capsule-laying ceremony diha sa Pilipog-Gabi Coastal Road sa Lungsod sa Cordova sa nahisgutang proyekto.

Ang Cordova-Lapu-Lapu City Bridge project langkuban kini sa 30-meter pre-stressed concrete bridge nga magdugtong sa Pilipog-Gabi causeway ngadto sag i-proposed sa Babag-Basak-Subabasbas Bypass road.

Dugang pa, usa ka 150-meter bypass road perpendicular sa tatayan ang tukoron usab.

Base sa taho sa Public Information Office sa Dakbayan sa Lapu-Lapu nga ang tulay adunay kini upat ka lane alang sa mga sakyanan, bike lane sa matag kilid ug sidewalks alang sa pedestrian.

Si Chan nagkanayon nga ang maong proyekto magpamubo sa oras sa pagbiyahe ug maghatag kini og safety ug komportable nga pagbiyahe sa mga motorista ug pasahero. Ang maong proyekto usab makatabang sa mga residente sa Dakbayan sa Lapu-Lapu ug kadtong mga nagtrabaho sa Lungsod sa Cordova ug sa mga patigayon.

Nunot niini, si Mayor Junar “Ahong”Chan nipadayag sa iyang kahangop ngadto sa iyang asawa sa initiative ug paningkamot niini nga makatigom og pundo alang sa proyekto nga makatabang sa pagpaloag sa kahuot sa trapiko sa mga silingang barangay. — /BDB (BANAT NEWS)