Track oval sa CCSC sugdan na sa pag-ayo

CEBU, Philippines — Andam na nga i-instalar ang rubber granules nga gamiton alang sa track oval sa Cebu City Sports Center nga gikatakdang himoon karong adlawa Mayo 13, dungan usab sa re-opening sa Olympic-size swimming pool ngadto sa publiko.

Kini ang gipahibawo ni Cebu City Sports Center chairman John Pages sa The Freeman.

Suma pa ni Pages nga gihuwat lang sa contractor nga mahuman ang Central Visayas Regional Athletic Association (CVIRAA)’s Regional Meet una sila makasugod sa pagpamutang sa rubber diha sa oval.

Dugang ni Pages nga aduna pa silay duha ka buwan sa pag-trabaho niini apil na ang curing period sa dili pa ang Palarong Pambansa nga himoon karong Hulyo 6 ngadto sa Hulyo 17. Kahinumduman ang kataposan nga pag-ayo sa CCSC oval niadto pang dul-an napulo ka tuig na ang nilabay ug gumikan kay aduna na kini mga depekto gikinahanglan na gyud kini nga ilisan nonot sa pagpahigayon sa Palaro dinhi sa dakbayan sa Sugbo.

Bisan pa sa preventive suspension ni Mayor Mike Rama, si Pages miingon nga nakahan-ay na kini daan.

Gawas niini, ang CCSC mipahibawo alang sa subling pagbukas sa olympic-size swimming pool ngadto sa publiko karong adlawa.

Ang newly-refurbished pool unang nagamit atol sa CVIRAA.

Ang swimming pool buksan na alang sa publiko gikan sa Lunes ngadto sa Sabado gikan sa alas 6 sa buntag hangtud sa alas 8 sa gabii.

Ang bayranan niini misaka na gikan sa P50 sugod sa alas 6 sa buntag hangtud sa alas 1 sa hapon ug P60 sugod ala 1 sa hapon hangtud sa alas 8 sa gabii.

Hinuon dunay special rates ang ihatag ngadto sa mga estudyante, City Hall employees ingon man sa mga senior citizens ug PWDs. — /MEL (BANAT NEWS)