Mga biktima sa bagyong Odette midawat OG tabang pinansyal

CEBU, Philippines — Nakadawat sa pinansiyal nga ayuda nga P10,000 ang matag pamilya sa tulo ka mga Barangay sa siyudad sa Lapu-Lapu nga mga biktima sa bagyong Odette nga nahitabo niadtong Disyembre 16, 2021.

Natigayon ang pag apud apod sa ayuda pinaagi usab sa pag-abag sa buhatan ni Senador Imee Marcos.

Gipahigayon kini didto sa Hoops Dome sa Barangay Gun-ob diin mokabat sa 1,100 ka mga pamilya nga nagagikan sa tulo ka mga barangay sa mainland ang nakadawat sa ayuda.

Kini naglakip sa Barangay Babag, Barangay Bankal ug Barangay Agus

Ang unang hugna sa distribution gisugdan niadtong Sabado ug mohangtud kini sa adlaw nga Martes hangtud makumpleto ang 19 ka barangay sa mainland ug 11 ka barangay sa Isla sa Olango.

Si Rosita Bentulan nga taga Barangay Agus sa siyudad sa Lapu-Lapu nga usa sa nakadawat sa maong pinansiyal nga ayuda ang gibati og hilabihan nga kahinangop.

Matud pa niya nga dako kaayo kini og ikatabang sa hingpit na nga pagpabarog sa nagusbat nilang panimalay tungod sa pagkusokuso sa bagyong Odette. — /MEL (BANAT NEWS)

CEBU, Philippines — Mokabat sa 50 ka mga Persons with Disability (PWD's) ang nakadawat og livelihood assistance nga nagkantidad og P10, 000.00 matag usa gikan sa kagamhanan sa dakbayan sa Mandaue.

Si Mandaue City mayor Jonas Cortes maoy nangulo sa pagtunol sa maong kantidad ngadto sa mga benepisaryo nga mi-qualify sa maong programa human sa higpit nga paghashas.

Gihimo kini sa mayor aron paghatag og ayuda nga pinansyal sa mga PWDs ilabi na alang sa ilang panginabuhian diin pipila ang adunay bag-o nga gisugdan nga negosyo.

Sa nasayran nga gitinguha ni Mayor Cortes nga makabaton og kaugalingon nilang income ang mga PWD's sa dakbayan alang sa ilang inadlaw-adlaw nga panginahanglan.

Si Mayor Cortes ug Bise-Mayor Glenn Bercede, ug mga konsehales nga naglakip kanila ni Jimmy Lumapas ug mga kaubang sakop sa konseho sa dakbayan ang mitunol sa livelihood assistance ngadto sa mga PWD.

Gitambongan usab kini ni DILG Mandaue City Director Johnjoan Mende. — /MEL (BANAT NEWS)