Regulasyon sa E-bike ipatuman sunod buwan

CEBU, Philippines — Gipaningkamotan sa Dakbayan sa Talisay nga mapatuman nila ang regulasyon sa E-bike sa sunod buwan matud pa ni Jonathan Tumulak, pangu sa City of Talisay-Traffic Operation Development Authority (CT-TODA).

Si Tumulak nipahibawo nga nahuman na siya sa pagkolekta sa mga sugyot ug rekomendasyon gikan sa 14 ka barangay sa siyudad nga adunay mga namasaherong e-bikes.

Matud pa niya nga ang iyang gipakigkitaan mao ang mga barangay kapitan ug uban pang mga opisyales nga maoy labing nasayod sa ilang barangay.

Usa sa mga regulasyon nga ilang nasabotan nga kinahanglan 18 anyos pataas lang ang makamaneho og e-bike,  kinahanglan sab nga kini rehistrado sa barangay kung asa siya magdagan, residente ang drayber sa barangay kung asa siya namasahero ug ipaubos sila sa road safety seminar.

Ang color coding ang ila sab unya nga ipatuman kay naa man silay plaka nga ihatag sa matag e-bikes.

Nagkanayon si Tumulak nga ipaubos sa drug test ang mga drayber aron masiguro ang kaluwasan sa mga pasahero.

Gituki sab ang posibleng regulasyon sa plitehan tungod kay daghan ang nangreklamo nga dagko og paningil ang drayber sa e-bike.

Sigon pa ni Tumulak nga mosunod ang ilang lakang mao ang pakigtagbo sa city council aron hisgutan kung ang himuon resolusyon o ordinansa ba kini nga pagasundan sab dayon kini og public hearing.

Ang Talisay City adunay gibanabanang kwatro mil ka e-bikes nga namasahero sa mga barangay. (BANAT NEWS)