CDRRMO: Gawas sa paghatud og tubig maghatud usab sila og pasyente

CEBU, Philippines — Giangkon sa Talisay City Disaster Risk Reduction and Management Office nga dili sa tanang higayon paspas ang ilang paghatud og tubig ngadto sa kabarangayan niining nasinati nga grabeng kainit sa panahon.

Si Alvin Santillana, pangulo sa CDRRMO nihangyo sa publiko sa pagsabot ilabi na nga ang ilang sakop anaa usab kini pasyente nga ipanghatud ngadto sa tambalanan.

Matud ni Santillana nga matag adlaw aduna sila’y 15 ngadto sa 20 ka Talisaynon nga serbisyohan apil na niini ang mga gipang-dialysis. Gawas pa niana, hinay na usab kaayo ang agas sa tubig sa mga fire hydrant.

Si Santillana nagkanayon nga ang ilang gipanghatdan karon og tubig sulodd sa duha ngadto sa tulo matag semana mao ang mga barangay sa Maghaway, Tapul ug adunay request usab gikan sa mga barangay sa Tabunok, Dumlog ug San Roque.

Gipadayag ni Santillana nga dili nila mahatagan ang binagsa nga hangyo kini aron dili usik ang ilang oras ug dili dali maguba ang ilang kahimanan.

Si Santilla nisugyot nga magtapok og mga baril nga dinaghan aron sila mohunong sa usa ka lugar o ang subdivision pinaagi sa ilang home owners mopadala og request kanila aron tingub ang ilang paghatud. BDB BANAT NEWS