Probinsiya nakigkolaborasyon alang sa solar power plant

CEBU, Philippines — Ang chief executive officer sa labing unang solar power plant nga tukoron sa Probinsiya sa Sugbo ang nakigtagbo kang Gobernador Gwendolyn Garcia alang sa kolaborasyon sa dugang proyekto tali sa kagamhanan sa probinsiya.

Si Jose Manuel Enrecanales y Domecq, CEO ug chairman sa Acciona Energia ang mapasalamaton sa gobernador sa pakig-partnership niini sa ilang kompaniya.

Ang maong kompaniya mo-construct, operate ug magmentinar sa 150-Megawatt Solar Power Plant sa Lungsod sa Daanbantayan diin mao kini ang unang public-private-partnership sa solar power generation.

Base sa taho sa Sugbo News, si Entrecanales nipadayag sa iyang tinguha sa pagsustiner sa partnership isip suporta sa kauswagan sa Sugbo nga gihulagway nga numero uno nga probinsiya sa Pilipinas.

Sa iyang bahin, gipaniguro ni Garcia ngadto kang Entrecanales nga kanunay niya i-prioritize ang mga proyekto nga makabenepisyo sa mga Sugboanon.

Nasayran nga niadtong Marso 16, 2024, ang Acciona Energia ug Kapitolyo nigama og landmark deal alang sa joint venture project kabahin sa 150-MW solar power plant nga tukoron diha sa 187-ektaryang luna sa Lungsod sa Daanbantayan.

Gipanglantawan nga ang maong proyekto tubag sa nagsaka nga panginahanglan sa enerhiya sa probinsiya nga padayong niuswag.

Nasayran usab nga ang Acciona Energia anaa kini sa early stage sa negosasyon tali sa laing duha ka LGU sa Sugbo nga gilangkuban sa Dakbayan sa Toledo ug Lungsod sa Dumanjud alang sa construction, operation ug maintenance sa duha ka solar power plants sa maong mga dakbayan ug lungsod alang sa pagpausgwag sa energy infrastructure ug seguridad sa Sugbo.

Ang Acciona usa kini ka global company nga nagtutok sa sustainable solutions alang sa climate change mitigation, adaptation, resilience ug decarbonization sa ekonomiya pinaagi sa development ug management sa infrastructure ug services ilabi na sa renewable energy, water, transportation ug mobility, waste, ug eco-efficient buildings.  Ang Acciona’s infrastructure arm ang nalambigit usab sa construction sas 8.5 kilometer nga Cebu Cordova Link Expressway.

Atol sa iyang pagbisita, si Entrecanales ang giubanan sa ubang executives sa Acciona nga gilangkuban nila ni Chief Financial officer Jose Entrecanales; Jose Gabriel Martin Fernandez, presidente sa Acciona Foundation; Ignacio Domecq, business development director sa Acciona alang sa Southeast Asia; Ruben Camba, director sa infrastructure sa Acciona sa Southeast Asia; ug Fermin Alvarez, general manager sa Freya Renewables. —The Freeman