Mga atleta sa CVIRAA adunay e-pass aron ma-monitor sa kapolisan

CEBU, Philippines — Hapsay ang pagsugod sa Central Visayas Regional Athletic Association (CVIRAA) niadtong Mayo 4, 2024 ug hangtud karon nga nagpadayon ang mga kalihokan sa maong athletic competition matud sa Cebu City Police Office.

Si Police Colonel Ireneo Dalogdog, direktor sa CCPO nagkanayon nga wala sila’y natala nga mga kakulian sa nagpadayon nga kalihokan sa CVIRAA.

Gipaniguro sa CCPO ang seguridad sa mga delagado gikan sa nagkalain-laing probinsiya sa rehiyon-7.

Ang nahisgutang mga delegado gipahiluna kini diha sa 20 ka billeting areas sa Siyudad sa Sugbo.

Matud ni Dalogdog nga ang mga atleta aduna kini e-pass aron ma-monitor sa kapolisan ang ilang paggawas ug pagsulod sa billeting areas kuyog sa ilang coaches.

Ang mga venue sa mga duwa aduna usab kini mga polis nga nagbantay apan gipasabot ni Dalogdog nga hatagan nila og priority kadtong sports nga daghang manan-aw nga mga tawo aron malikayan ang kasamok.

Gipahinumduman ni Dalogdog ang mga PNP personnel nga dili magduwa og cellphone samtang naka-duty aron dili mapahamtangan og silot.

Subay niini, ang City of Talisay-Traffic Operations Development and Authority (CT-TODA) nipatuman og maximum tolerance ngadto sa tanang drayber sa mga delegado sa CVIRAA nga makalapas og lagda sa trapiko sa Dakbayan sa Talisay ilabi na kadtong gikan sa layong dapit.

Kini ang gibutyag ni Jonathan "Joy" Tumulak, pangulo sa CT-TODA.

Matud ni Tumulak nga gikan sa pagbukas sa CVIRAA niadtong Sabado hangtud niining pagsuwat niining balita gipahibalo na nila ang mga traffic enforcer sa pagpahigayon  og maximum tolerance alang sa tanang drayber sa mga delegado nga gikan sa Probinsiya sa Sugbo ug sa silingang mga probinsiya.

Si Tumulak nagkanayon nga kong adunay mga drayber sa CVIRAA nga makasulod sa Dakbayan sa Talisay nga makahimo og traffic violations ilaha kining parahon ug pahibaw-on sa mga kalapasan nga ilang nahimo kalabot sa lagda sa trapiko apan dili nila isyuhan ug citations tickets.

Giingong ang pagdili og isyu og citations tickets isip kini sa pagtamod sa ilang pagbisita sa siyudad apan pahibaw-on sila sa ilang mga kalapasan nga nahimo. (BANAT NEWS)