Daluz andam makigpulong sa bag-ong gitudlong OIC GM sa MCWD

CEBU, Philippines — Andam ang Metro Cebu Water District (MCWD) nga makigpulong ngadto sa bag-ong gitudlo nga OIC General Manager kun kini makigtambayong kanila ug magsiguro nga way resolusyon nga ipagawas nga magdili sa iyang pagsulod sa edipisyo.

Sa pakighinabi sa mga tigbalita niadtong Lunes, Abril 29, 2024, si MCWD Chairman of the Board, Attorney Joey Daluz III miingon nga si Attorney Joselito Thomas Baena wala giila isip OIC GM tungod kay dili siya "connected" sa gobiyerno.

Matud ni Daluz, sa dili pa ma-delegate ni bisan kinsa nga hatagan  og otoridad, katungdanan o bisan pagka OIC, kinahanglan una nga siya kawani sa gobiyerno.

"Kataw-anan na gamay," sigun pa ni Daluz.

Sa bahin sa function ni Baena sulod sa MCWD premises, si Daluz niingon nga nakadawat lang siya og report nga igo lang “mi-lili” si Baena sulod sa edipisyo.

Sa pagdetalye bahin sa pagsulod ni Baena sulod sa MCWD, si Daluz niingon nga dili nila buhaton ang samang kapalaran nga nahitabo sa unang gitudlo nga OIC GM nga si Attorney John DX Lapid kinsa gidid-an sa pagsulod pinaagi sa gipagawas nga resolusyon. Matud ni Daluz, ning higayona, magdepende kini kung mosulod si Baena sa MCWD aron “i-insistir” ang iyang installment nga posibleng makatumaw og “kalibog” sa management.

"But if he will just enter and talk to us about what he can do, then maybe okay lang na no? Dili lang sya mo insist on OIC kay karon nga normal na kaayo ang dagan sa MCWD and we are focused on looking for solution then dili lang unta na samukon pag-usab," matud pa ni Daluz.

Apan si Daluz mipahibalo nga kun mopili si Baena nga makig-diyalogo sa MCWD, kinahanglang magpadala una kini og suwat nga magtumbok sa mga butang nga kinahanglang hisgutan.

Sa bahin sa General Manager sa MCWD, Edgar Donoso, kini miingon nga wala’y gipresentar nga dokumento si Baena nga nagpaluyo sa iyang pagkatudlo isip OIC GM aron i-insister ang iyang awtoridad.

Gihulagway ni Daluz ang pagsuroysuroy ni Baena nga nagpresentar sa iyang kaugalingon isip OIC GM sa MCWD  matawag nga "Bordering Usurpation of Function."

Si Baena sa dihang gikuhaan sa iyang bahig, kini mitubag pinaagi sa text message nga gihangop niya ang pamahayag sa MCWD bahin sa iyang appointment.  IBM BANAT NEWS