Mga BHW sa Mandaue gipasidunggan
CEBU, Philippines — Gipasidunggan ni Mayor Jonas Cortes ang mga Barangay Health Worker (BHW) sa Siyudad sa Mandaue nga nagserbisyo sa mga Mandauehanon sulod sa taud-taod na nga panahon.
Kini gihimo isip pagpahaom sa pagsaulog sa Barangay Health Worker’s Day diin iyang gihatagan og Loyalty Award ang mga BHW nga nagserbisyo sa taas nga panahon.
Naglakip sa top 5 nga awardees sila si Analiza Rosell gikan sa Barangay Mantuyong, Analiza Patindol sa Barangay Tingub, Ricalita Alicio gikan sa Barangay Opao, Maria Teresa Castaños sa Barangay Jagobiao ug Joan Camaryo sa Barangay Mantuyong.
Nagpasalamat ang mayor ngadto kanila sa serbisyo nga gihatag sa mga BHW sa ilang komunidad.
Sa pagpangalagad nga nagpangga sa katawhan maoy iyang gipahibalo nga umentohan ang sweldo sa mga BHW.
Sa pagsaulog sa Barangay Health Workers Day sa Mandaue City adunay libre nga serbisyo nga gidalit alang sa mga BHW nga gilangkuban sa medical consultation, vital signs taking, breast assessment, libreng HIV testing ug ang Mandaue Mobile Clinic nga nagpahigayon og libreng x-ray ug laboratory.
Gawas kang Cortes, si Bise Mayor Glenn Bercede ug mga sakop sa konseho sa siyudad ang nitambong sa maong kalihokan. — /BDB (BANAT NEWS)
- Latest
