Pagpahigayon sa Ironman hapsay ug malinawon

CEBU, Philippines — Hapsay ra ug luwas ang gipahigayong Ironman 70.3 karong tuiga nga gihimo sa dakbayan sa Lapu-Lapu niadtong Domingo, Abril 21, 2024.

Suma ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin pinaagi sa pakig-alayon sa ubang ahensiya sa gobyerno aktibong nihimo og security coverage ang kapolisan sa kalihukan.

Gitataw ni Lt. Col. Pelare nga ang Central Visayas pabiling luwas ug malinawon ug kun dunay mga international events ang kapolisan sa Rehiyon Siete hingpit nga mohatag og seguridad.

Nasayran nga kabahin sa security coverage sa PRO-7 ang debriefing, critic ug analysis kay tan-awon nila kun unsay kinahanglan palambuon human sa kalihukan.

Apil sab sa mando ni Brigadier General Aberin nga mohatag og awards sa mga police personnel nga naghimo og security coverage nga epektibo gyud kaayo.

Gipadayag usab ni Police Colonel Ali Baron, OIC director sa Lapu-Lapu City Office (LCPO) ang pasalamat sa tanan nga nakatampo sa kalampusan sa kahapsay ug kalinaw sa gipahigayon nga Ironman 70.3 Triathlon sa siyudad sa Lapu-Lapu.

Sa nasayran kapin 1,700 ka mga polis ang gipakatap uban sa Coast Guard, Regional Mobile Unit 7, CDRRMO, CTMS, BFP ug mga sakop sa force multipliers.  MEL BANAT NEWS