Mga nakalapas sa 3-meter easement gipadalhan na og final notice

CEBU, Philippines — Task Force Gubat sa Baha sa Dakbayan sa Sugbo sugod kagahapon nihatag na og final notice ngadto sa mga tagdumala sa 34 ka balay patigayon nga anaa sa upat ka barangay sa siyudad tungod sa paglapas sa 3-meter easement .

Kini ang gibutyag sa Task Force Chief Implementer Retired General Mel Feliciano atol sa panag-abot nila sa mga opisyal sa barangay nga nahimutang sa habagatan nga bahin.

Matud ni Feliciano nga ang mga nakadawat sa ilang final notice mao kadtong nalakip sa Estero de Parian nga sapa nga gidumala sa Task Force North River Commander Retired General Aderson Comar.

Ang Barangay Parian, Sto. Niño, San Roque ug Tinago maoy sakop sa Estero de Parian.

Gibutyag sa maong opisyal nga sa Barangay Sto. Niño adunay 19 ka balay patigayon ang gipadad-an og final notice nga naglakip sa mga dagkong business establishment samtang sa Tinago adunay duha ug sa San Roque lakip ang Parian adunay tag unom.

Matud ni Feliciano nga ang Business Permit and Licensing Office maoy mo isyu og cease and desist orders sa ilang mga operasyon kong magdumili sa pagsunod ang mga establisamento sa maong final notice.

Iduso usab sa task force ngadto sa buhatan ni Mayor Michael Rama alang sa closure order kong magmagahi ang maong 34 ka balay patigayon. BDB BANAT NEWS