Presyo sa street lamps sa srp gikwestyon

CEBU, Philippines — Usa ka executive session ang gipatawag aron hisgotan ang mga items ubos sa gisugyot nga P20 milyones nga budget gikan sa City Treasurer's Office (CTO) alang sa Street Lighting System Project sa South Road Properties (SRP).

Kini human gikwestyon ni Konsehal Nestor Archival Sr., Minority Floor Leader ang presyo nga giduso alang sa street lighting system diha sa South Road Properties.

Si Cebu City Councilor Noel Wenceslao, Chairman sa Committee on Budget and Finance maoy nipasiugda sa resolusyon nga nagtinguha sa pag charge sa kantidad nga P19,969,888 sa Maintenance and Other Operating Expenses gikan sa nangaging katuigan ubos sa LSA-all Offices ubos sa Office of the City Administrator Account.

Kini aron mabayran ang voucher sa Quirante Construction Corporation alang sa street lighting system nga proyekto sa na-install nga HL Solar 365-50W ug ubang mga butang nga gibutang sa SRP.

Atol sa regular session niadtong Miyerkules, ang maong resolusyon natuki diin si Wenceslao nangayo usab og pagtugot sa konseho sa dakbayan.

Apan, si Konsehal Nestor Archival Sr., Minority Floor Leader mipadayag sa iyang pagsupak ug miingon nga "dili husto" ug "sobra ka mahal" ang giduso nga presyo. 

Matod niya, ang usa ka street lighting nga adunay post ug motion sensor nagkantidad ug P124,000 matag usa nga alang kaniya “mahal kaayo”.

Laing butang nga iyang gitumbok mao ang 10 metros nga poste sa 80 watts nga solar hotdip nga poste nga nagkantidad og mga 49,769 matag usa.

Gawas niini gitumbok usab niya nga ang upat ka metros nga poste alang sa 50 watts gamay ra unta apan mokantidad gihapon og mga 49,000 matag usa.

“Mahal kaayo ni Mr. Chairman. So again, kung i compare nimo ang ten-meter nga 80 watts nga hotdip pole its 49,769 unya og mupalit ka og four-meter wa gani makatunga this is four compared to ten, 49, 730 so mu mudiperensya lang 39 pesos,” matud ni Archival.

Gawas niini, niingon usab si Archival nga ang kinatibuk-ang 122 ka street lights ug ang smart lighting system nga 168 wala pa matino kon asa kini ibutang.

Dugang pa, gipasiugda usab ni Archival nga ang single-arm nga suga sa kadalanan nga adunay usa ka suga mga P49,000 samtang ang single-arm nga adunay duha ka suga nagkantidad og 140,000 matag usa.

Subay niini, giamendahan ni Wenceslao ang iyang naunang resolusyon ug nagpatawag og usa ka executive session aron matuki ang detalyadong katarungan sa matag items sa proposed budget.

Ang konseho miuyon niini nga mosyon ug ang executive session ipahigayon sa Mayo 8, 2024. (BANAT NEWS)