Resort hotel sa Panglao gipasira

CEBU, Philippines — Usa ka resort hotel sa Panglao, Bohol ang gipasirad-an sa kagamhanan sa lungsod tungod sa pag-operate nga walay business permit.

Ang mga opisyal sa munisipyo, pinangulohan ni Panglao Mayor Edgardo Arcay, nagsilbi sa closure order sa Villa Tomasa Q niadtong Martes sa buntag, Abril 16.

Si Arcay ,iingon nga ang hotel nag-operate nga walay business permit bisan pa sa daghang mga abiso gikan sa munisipyo sa pagkuha niini.

 Kinahanglan natong isira kini. Kung adunay mahitabo sa ilang mga bisita, kinsa ang manubag kung wala sila y permit sa pag-operate?  matud ni Arcay. Ang  entrada sa hotel gi-padlock pagkahuman gipatuman ang closure order.

Nailhan ang maong hotel nga Alona Kew White Beach Resort hangtod nga giabangan kini sa pamilyang Guardo sa Cebu City ug girepresentar ni Dondon Guardo niadtong tungora dihang gi-serve ang closure order.

Gitug-an niya si Arcay nga walay business permit ang hotel kay wala kini giproseso sa mga nag-abang. Nasayran nga dunay problema nga nitumaw sa kontrata ug kasabotan sa management ngadto sa tagiya sa maong resort.

 Walay labot ang gobyerno sa munisipyo sa inyong mga isyu sa mga lessor,  giingnan ni Arcay si Guardo.

Ang hotel gipanag-iya sa managtiayong Eteria Evelyn Naval-Flores ug Magileo Wilfredo D. Flores.

Matud sa magtiayon nga niadtong Enero sa miaging tuig nisugyot ang mga Guardo nga andam silang moabang sa Alona Kew White Beach Resort sa kantidad nga P10 milyones matag buwan. Hangtud nga nagkapinirmahay ang duha ka habig Enero 30, 2023.

Apan matud pa wala makatuman sa kontrata ang nag-abang hangtud nga niburot na kini ngadto sa P63 milyones mao nga nakadesider silang dili na ipadayon ang pagpaabang niini.  

Human na  serve ang closure order, ayha pa nakasud ang kampo sa tagiya sa maong hotel.

Si Arcay miingon nga imposible na nga maka-renew sa business permit ang nag-abang tungod kay mismo ang nagpaabang dili na gusto mohatag og lessor permit. (BANAT NEWS)