Upat ka regular nga kawani sa Cebu City Hall wala sweldohin

CEBU, Philippines — Upat ka regular nga empleyado sa Cebu City Hall nga nangangkon nga wala pa sweldohi sulod sa napulo ka buwan ang nipadayag sa ilang sentimento sa media.

Nasayran nga ang maong mga empleyado adunay mga plantilla position ug nanawagan sila pinaagi sa pagpahigayon og press conference aron mapaabot ang ilang mga reklamo sa ilang wala pa mahatag nga sweldo bisan pa kini og gipaboran sila sa Civil Service Commission-7.

Lakip kanila si Sybil Ann Ybañez kinsa orihinal nga naisyuhan og item isip Local Assessor Operations Officer 3 ubos sa Cebu City Assessor diin nagkanayon nga niadtong Hunyo 1, 2023 nakadawat sila sa ilang reassignment order.

Si Ybañez nadestino isip house parent sa Operation Second Chance diha sa Barangay Kalunasan.

Ang iyang mga kauban sa samang buhatan nga sila si Maria Almicar Diongzon gibalhin diha sa South Road Properties (SRP), si Filomena Atuel, gibalhin sa Cebu City Anti-Mendicancy Office, samtang si Chito Dela Cerna gibalhin sa Cebu City Environment and Natural Resources (CCENRO).

Gibutyag ni Ybañez nga kalit siyang gi-reassign sa Operation Second Chance bisan pa sa Dakbayan sa Talisay siya nagpuyo.

Ug nihangyo siya nga madestino diha sa usa ka day shift tungod kay lactating mother siya kaniadtong panahona apan gibalibaran kini.

Ang maong mga kawani nangayo og tambag sa Civil Service Field Talisay City ug giingong gipahibalo sila sa maong ahensiya nga mahimo sila nga mo apelar sa ilang reassignments ug mosumiter sa ilang apelar ug mahimo dayon sila nga mobalik sa City Assessor’s Office.

Apan dihang ni-report ang maong mga kawani sa City Assessor’s Office wala sila hatagi sa gikinahanglan nila nga gamit ug gatapok sila sa usa ka lamesa.

Giingong si City Assessor Theresa Rosell nangatarongan nga dili sila hatagan og buluhaton samtang wala pa mapagawas ang hukom sa ilang apelar.

Gibutyag ni Ybañez nga sa ilang pag-file og leave of absence wala mopirma si Rosell diin wala niya gi-honor ang ilang pagbalik sa opisina.

Ug sa maong sitwasyon, ang maong mga kawani nangayo og tabang sa Civil Service Commission, DILG, BOGF ug Ombudsman sa ilang kahimtang tungod kay nagsugod na nga wala na sila sweldohi. Niadtong Oktubre 2023, nadawat nila ang desisyon sa CSC-7 nga nagkanayon nga ang ilang reassignment invalid.

Ang maong mga kawani nidala sa kopya sa desisyon ngadto kang Rosella apan giingong igo lang silang giingnan nga ilang basahon.

Niadtong Nobiyembre 3, 2023, ang City Assessor's Office gikataho nga nisang-at og motion for reconsideration ug gi-deny kini sa CSC.

Niadtong Marso 19, 2024 giisyuhan sila og “designation order” ngadto sa buhatan sa City Administrator Office ug gipasaligan sila nga ang ilang mga sweldo ma-release diin wala pa kini mapirmahi sa city assessor. BDB BANAT NEWS