Cebu City preparado na sa transport strike

CEBU, Philippines — Ang Cebu City Road Management Authority ( kanhi Cebu City Transportation Office) nakaandam na sa posibleng transport strike karong adlawa Abril 15, 2024 kini bisan pa man ang Federation of Cebu Transport Cooperative mipasalig nga dili sila moapil niini.

Ang siyudad adunay mga bus nga ipagamit sa mga tawo kun pananglitan maparalisar ang transportasyon sa mga tawo sumala pa ni RMA’s assistant head, lawyer Kent Francesco Jonggoy sa interyu kaniya sa The Freeman kagahapon.

Samtang ang hepe sa maong buhatan nga Raquel Arce mipasalig nga hugot nilang monitoron ang kahimtang sa transportasyon sa publiko karong adlawa.

“Rest assured that your Road Managers are here to provide road safety and ensure road accessibility,” puno pang Jongoy.

Hinuon kun basihan ang mga nakalabay nga mga nationwide transport strikes sa mga operators ug drayber kaniadto wala kini makabalda sa transportasyon sa siyudad.

Samot na karon nga mayoriya na sa mga pasaheroan nisanong na sa transport modernization sa gobiyerno sama aning PUV Modernization Project consolidation.

Si Mayor Michael Rama daan ng mipadayag og suporta sa modernisasyon sa transport sector sa gobiyerno.

“With that number, and with their assurance, it is safe to say that like other previously held strikes, the city will not be affected (in today’s strike),” puno pang Jongoy.

Awhag lang sa RMA  nga dili lang gyud babagan o alihan sa mga magprotesta ang trapiko aron dili makahasol sa publiko.

Ang transport groups nga PISTON ug MANIBELA sa sayo pa mipahibalo sa paglusad nila og duha ka adlaw nga transport strike sugod karong adlawa Abril 15.

Ang grupo miingon nga dili sila supak aning PUV modernization ang dili nila ganahan kaning mga regulasyon PUV Modernization Program (PUVMP).

Ang Federation of Cebu Transport Cooperative pinangulohan sa ilang chairman nga si Ellen Maghanoy miingon nga dili sila mosalmot sa strike, matud pa niya nga pwede ra gyud estoryahan ang mga isyu sa transport sector.

“We are committed to providing reliable and safe transportation services to the people of Cebu and upholding the interests of both our members and the commuting public,” dugang pang Maghanoy. — /IBM (BANAT NEWS)