Opisina sa OSCA dili pa ipabalhin
CEBU, Philippines — Ang buhatan sa Office of the Senior Citizens Affairs (OSCA) magpabilin sa kasamtangang nahimutangan niini human nga gibakwi ni Cebu City Mayor Mike Rama ang giingong iyang gipirmahang memorandum aron kini ibalhin og laing dapit.
Ang desisyon sa mayor daw nakaibot og tunok sa dughan sa kasamtangang pangulo sa departamento nga si Atty. Homer Cabaral sumala pa sa report sa City’s News and Information team.
Una niini, si Konsehal Pastor “Jun” Alcover Jr. milighot pagkasayod bahin sa memo ug siya miapelar kang Rama nga dili ihinayon ang pagbalhin sa maong buhatan kay ang dapit pabor kaayo sa mga senior citizens.
Ang maong memo penetsahan og Abril 2,2024 nga matud pa pirmado sa mayor. Apan si Rama miingon nga iyahang balikan og tan-aw ang maong memo kay wala siya makahinumdom nga duna siya’y gipirmahan bahin niini.
Giingong normal na nga pirmahan sa mayor ang mga dokumento kun kini nasusi na og maayo sa gitahasan o otorisadong opisyal. Apan basis a kopya sa maong memo nga gi-post ni Alcover giingong hanap ang pirma ni Rama.
Ang mayor miingon atol sa iyang regular nga program sa Sugboano Channel sa siyudad, iyang susihon ang maong dokumento.
“Sus kakita palang ka sa mga papel nga akong pinirmahan. Unya uban dali-dalion pako. Wala mo kabantay ana?“Gatoo mo saayon ra mamirma kung mayor ka? Dayun kung balibaran, masilo na,” pasabot pa sa mayor.
Ang memo gikatahong nagmando sa OSCA sa pagbalhin kay gamiton na sa City Treasurer’s Office ang giokupar nilang lugar.
“Nalipay mi nga naka-decide si Mayor nga gi-revoke ang memo kay pinangga baya niya ang mga senior citizens,” ni Cabaral pa. Gikan sa The Freeman, IBM BANAT NEWS
- Latest
