Opisyales sa MCWD ipatawag sa Mandaue

CEBU, Philippines — Gisugyot karon ni Konsehal Nerissa Soon-Ruiz sa Dakbayan sa Mandaue ang pag-umol sa kagamhanan sa siyudad og water district sa pagtubag sa reklamo sa mga molupyo ug mga gagmay nga magpapatigayon nga nakasinati og hinay nga volume sa supply sa  tubig.

Samtang si Konsehal Jennifer Del Mar, chairman sa Committee on Disaster Risk Reduction and Management niduso og resolusyon nga nagsugyot sa pagpatawag sa mga opisyal sa Metropolitan Cebu Water District nga motambong sa sunod semana nilang regular session nunot sa mga reklamo sa 27 ka barangay sa pagnihit sa tubig.            

Matud ni Del Mar nga tinguha sa iyang pagpatawag sa mga opisyal sa MCWD nga ilang masayran kon unsay ilang mga gihimong lakang kalabot sa nasinating problema sa tubig.

Si Del Mar nanghinaot nga ang MCWD nakapangandam sa pagnihit sa tubig niining mga panahona nga naglagiting ang kainit sa adlaw.

Sa iyang bahin, si Ruiz nagkanayon nga panahon na karon sa kagamhanan sa siyudad nga magbaton kini og desilanation plant sa pagtubag sa panginahanglan sa tubig. BDB BANAT NEWS