74-anyos nalumos samtang naligo sa dagat atol sa Easter Sunday

CEBU, Philippines — Usa ka 74-anyos nga senior citizen ang nalumos samtang naligo sa dagat diha sa Sitio Punong, Barangay Ibo, Dakbayan sa Toledo niadtong Domingo sa gabii.

Ang biktima giila nga si Alfredo Rubin Caballero, minyo, residente sa Barangay Tubod Proper, sa maong siyudad.

Base sa taho sa Toledo City Police Station nga nakadawat sila og alarma nga giingong adunay naunlod nga tawo ug dali nila kining girespondehan.

Si Caballero nakit-an nga naglutaw na diha sa fish pond ug gisuwayan pa kini og luwas sa mga kabanay apan wala kini matabang.

Nasayran nga ang biktima uban sa iyang mga kabanay nga nagsaolog sa Easter Sunday diha sa kadagatan sa Barangay Ibo ug nag-inom.

Mga alas 3:00 sa hapon sa samang adlaw dihang nakauli na ang mga kabanay ni Caballero sa ilang mga balay nabantayan nga wala nila makuyog ang naulahi.

Gipangita si Caballero sa iyang mga kabanay ug nasigpatan kini diha sa fish pond  naglutaw nga wala nay kinabuhi.

Matud sa kapolisan nga walay nakita nga foul play sa maong insidente. (BANAT NEWS)