Hukom sa Korte Suprema maoy moklaro sa isyu sa MCWD

CEBU, Philippines — Ang kontrobersiya sa Metro Cebu Water District (MCWD) naabot na sa Korte Suprema (SC) nga  nipagawas og notisya nga nagmando sa kampo ni kanhi Cebu City Mayor Edgardo Labella sa pag komento diin maoy mga respondents sa petisyon nga gisang-at sa mga kanhi sakop sa MCWD board.

Mao kini ang pamahayag ni Attorney Amando Virgil Ligutan, legal counsel ni Atty. Ralph J. Sevilla, Augustus G. Pe Jr., ug Atty. Cecilia J. Adlawan, kanhi MCWD board members kansang pagpatangtang gimando ni kanhi Labella sa pakighinabi kagahapon (Dominggo), Marso 31, 2024.

Pagklaro kini sa unang nigawas nga report nga sila maoy gipakomento sa Korte Suprema kabahin sa ilang petisyon nga gisang-at kaniadto.

Matod ni Ligutan, niadtong miaging Martes nadawat sa iyang mga kliyente ang notisya gikan sa SC nga nagpahibalo kanila nga nadawat na nila ang kopya sa ilang petisyon ug gihangyo karon ang mga respondents sa kaso nga moduso og komento.

Ang kampo sa kanhi MCWD board misang-at sa maong petisyon ngadto sa SC niadtong Agosto 2023 nga nagkuwestiyon sa otoridad sa nitaliwang mayor Labella sa pag-terminate sa policy-making body sa MCWD atol sa iyang administrasyon.

Ang ubang respondents sa petisyon mao ang Local Water Utilities Administration (LWUA), Acting Administrator Jeci Lapus, Interim Board of Directors nga sila si Atty. Roberto S. Andres, Eileen L. Dela Vega. Cristina Marcelina, ug ang MCWD.

Ang maong resolusyon gi-isyu niadtong Enero 31,2024 ug gimandoan silang pagduso sa ilang komento sud sa napulo ka adlaw gikan sa pagdawat sa notisya. Wala pa hinuon makuha ni Litugan ang komento sa mga respondents nga matud niya maoy basihan sa SC pag-deny o pagtugot sa ilang petisyon.

Gusto nilang masayran kun duna bay gahum ang mayor pag-terminate sa mga sakop sa MCWD board. May pagka-parehas kini sa sitwasyon sa kasamtangang MCWD board chairman nga si Atty. Joey Daluz ug mga sakop nga gustong gipatangtang ni Cebu City Mayor Michael Rama sugod niadtong Oktubre 31,2023.

Gitataw usab ni Ligutan nga ang pag-terminate sa iyang mga kliyente ubos sa administrasyon ni Labella maoy labing unang higayon sa kasaysayan sa nasud nga dunay local chief executive nga nanghilabot sa pagdumala sa local water district. Hinuon si Ligutan niingon nga ang iyang mga kliyente dili na interesadong ibalik sa pwesto, ang ilaha nalang ang hustisya ug katarungan tungod kay karong tuiga naman sab kutob unta ang ilang termino gawas kang Sevilla nga natapos na ang termino. — /IBM (BANAT NEWS)