17 ka sugarol sikop sa pagpangronda sa kapolisan sa Liloan

CEBU, Philippines — Nadakpan sa kapolisan sa Liloan Municipal Police Station ang 17 ka sugarol atol sa ilang pagpangronda sa tigbakay niadtong Huwebes Santo ug Biyernes Santo diha sa tulo ka barangay sa maong Lungsod.

Niadtong Huwebes Santo gironda sa kapolisan ang tigbakay nga gipahigayon diha sa Barangay Poblacion ug Barangay Catarman.

Gisundan kini og laing pagpangronda niadtong Biyernes Santo diha sa Barangay Tayud sakop gihapon sa maong lungsod.

Niabot ngadto sa 17 ka sugarol ang nasikop ug nagtingkagol karon sa detention cell sa Liloan Municipal Police Station.

Nasayran nga sa tulo ka pagpangronda sa kapolisan sa lungsod niabot sa 40 ka  tawo ang nakasibat sa dakop nga gihimo sa kapolisan.

Karong adlawa pasakaan og kasong kalapasan sa Presidential Decree 1602 kun “Anti-Gambling Law” ang mga suspetsado ug aduna kini piyansa nga P30,000 alang sa ilang tempraryong kagawasan.

Ang Liloan Municipal Police Station pinanguloha ni Major Eric Gingoyon nagpahimangno sa publiko nga determinado ang kapolisan sa lungsod sa pagdakop sa mga tawo nga mohimo og ilegal nga kalihokan.

Sayo pa, nagpahimangno na ang kapolisan nga bisan og gitutokan nila ang pagbantay sa seguridad sa Semana Santa apan ang ilang naandan nga law enforcement operations magpadayon. — /BDB (BANAT NEWS)