Bukirang barangay sa Cebu City gipaubos sa state of calamity

CEBU, Philippines — Giaprobahan sa Cebu City Council ang resolusyon nga nagbutang sa tanang bukirang barangay sa dakbayan sa state of calamity tungod sa epekto sa El Niño phenomenon.

Sa wala pa magsugod ang long weekend, ang Cebu City Council nipahigayon og online special session niadtong Miyerkules, Marso 27, 2024, aron hisgutan ang dinaliang pagtubag sa El Niño.

Atol sa sesyon, gituki ang resolusyon ni Konsehal Joel Garganera,Chairman sa Committee of Disaster Risk Reduction and Management sa Cebu City Council aron maaprobahan kini.

Gimando sab sa maong resolusyon nga tanang kinahanglanon aron maminusan ang negatibong epekto sa El Niño anha kuhaon sa Quick Response Fund sa Local Disaster Risk Reduction and Management Fund (LDRRMF) 2024."

Ang resolusyon ni Garganera naggumikan sa advisory nga gipagawas sa DOST-PAGASA niadtong Marso 7, 2024, nga nag-ingon nga ang El Niño nagsugod sa paghuyang ug mahimong mobalik sa ENSO-neutral nga kondisyon sa Abril-Mayo-Hunyo (AMJ 2024 season).

"Where all concerned agencies and the public are encouraged to keep on monitoring and take precautionary measures against its potential impacts," sigun pa sa resolusyon.

Gitumbok usab sa report gikan sa Cebu City Agriculture Department nga ang Butuanon River upstream ug Cotcot-Lusaran niubos na ang gidaghanon sa tubig.

Matud pa 50 porsiyento sab ang pagkunod sa tubig sa dams ug sa yuta kay menos kaayo ang paguwan ug nangliki na sab ang mga yutang pang-agrikultura tungod sa kakuwang sa tubig.

Si Garganera niingon nga ang resolusyon pahaom sa National Disaster Risk Reduction and Management Council (NDRRMC) Memorandum Order.

"This phenomenon warrants immediate measures and intervention to help our affected constituents cope with this calamitous situation," matud pa niini. — /IBM (BANAT NEWS)