Ika-79 ka tuig nga Takas sa Talisay gisaulog kagahapon

CEBU, Philippines — Malampuson ang pagsaulog sa ika-79 ka tuig nga Takas sa Talisay o Talisay Landing kagahapon sa buntag.

Ang kalihokan gihimo lang kini nga simple gumikan kay nasulod sa Semana Santa ang Marso 26 niining tuiga diin gisugdan kini sa Santos nga Misa ug dayon gisunod ang military parade uban ang mga kawani sa gobiyerno.

Nitambong ang mga beterano nga maoy rason sa pagsaulog sa kagawasan sa Sugbo diin sila usab ang gipahinungdan sa maong kasaulogan. Si Mayor Gerald Anthony “Samsam” Gullas, Jr. nibutyag nga daghan sa mga tawo ang wala na nanumbaling sa mga nahitabo kaniadto nga hinungdan sa natagamtam nga  kagawasan karon.

Matud ni Gullas nga ang maong kagawasan angayan kining isaulog sa pagpahinungod usab sa mga beterano kinsa nakig-away kaniadto alang niini.

“The importance the life we have today because of the people who fought 79 years ago”, matud ni Gullas.

Si Police Lieutenant Colonel Wayne Magbanua, pangulo sa kapolisan sa Dakbayan sa Talisay nibutyag nga dali ra nga natapos ang kalihokan ug wala rasab sila’y nabatyagan nga kakulian. BDB BANAT NEWS