Mga PUV nga nagbiyahe sa Osmeña Boulevard ibalhin og rota

CEBU, Philippines — Ang mga Public Utility Vehicles (PUV) nga nag-agi sa Osmeña Boulevard mahimong mabalhin sa dili madugay tungod sa Link to the Port feature sa Cebu Bus Rapid Transit (CBRT) project.

Kini sumala pa ni Atty. Kent Jongoy, CCTO Assistant Head sa pakighinabi kagahapon (Lunes) sa media.

Matud ni Jongoy nga ang Link to the Port nagbarog gikan sa intersection sa Sanciangko, usa ka bahin sa Osmeña Boulevard hangtud sa intersection sa MJ Cuenco atubangan sa Plaza Independencia.

Ang feature maglangkob usab sa pagkunhod sa kasamtangan nga gilapdon sa dalan sa Osmeña Boulevard apan mu extend pa sa sidewalk og labing menos tulo ngadto sa upat ka metros.  “It will be probably decrease the width of our road but we are now thinking to divert many of our PUJs who are plying in that ground, specifically in that portion of Osmeña Boulevard,” matud pa ni Jongoy.

Dugang pa niya nga ang feature mao usab ang mo convert sa lugar ngadto sa mga pedestrian nga mo-compress sa kasamtangang four-lane stretch sa Osmeña Boulevard ngadto sa two-lane road nga adunay extended nga sidewalk.

Matud niya, madasig niini ang katawhan sa paglakaw sa heritage district sa Sugbo nga nagpasiugda sa kultura ug historical significance sa dakbayan.

Tungod niini, niingon si Jongoy nga kinahanglang i-reroute ug i-divert ang mga PUV nga mobiyahe sa nahisgutang lugar.

Sa pagkakaron, niingon si Jongoy nga ilang gitutokan ang pagpakalma sa trapiko.

Dugang pa niya nga importante nga makig-estorya una sa mga PUV operators tungod kay dako ang epekto niini ngadto kanila tungod kay dugay na sila nga nagbiyahe sa maong rota.  Hinuon gipasalig ni Jongoy nga mohatag sila og alternatibong mga rota nga susama sa Osmeña Boulevard. (BANAT NEWS)