12 ka andana nga school building tukoron diha sa barangay Paknaan
CEBU, Philippines — Gipaabot nga tukoron diha sa barangay Paknaan siyudad sa Mandaue ang 12 ka andana nga building nga dunay 42 ka classroom.
Kini aron masulbad ang problema sa kakuwang sa classrooms sa maong barangay ingon man sa silingan nga mga barangay.
Gawas sa lawak saringan aduna usab kini libraries, laboratories, audio visual rooms, clinic home economics rooms ug ubang pasilidad.
Suma pa ni Mandaue City Lone District Representative Emmarie “Lolypop” Ouano-Dizon nga hapit na masugdan ang pagtukod sa maong building human sa ilang tigum uban sa mga opisyales sa Department of Public Works and Highways ug mga representante gikan sa central office sa Department of Education uban sa iyang bana nga si Opao Barangay Captain Nixon “Jojo” Dizon.
Dugang pa ni Dizon nga ang maong proposal nakapasar na sa initial assessment apil na ang soil test. “Kay ang DepEd nagkinahanglan gyud na sila nga makapasar gyud sa ilang standard ang soil test. Basin within this year ma prioritize sa DepEd ang pagtukod sa building here in Mandaue kay naa unta to sa Luzon but wala nakapasar sa soil test,” suma ni Ouano-Dizon.
Hinuon siya miingon nga kinahanglan pa nila nga i-finalize ang mga gikinahanglan nga dokomento alang sa lot donation ngadto sa DepEd aron kini malakip sa priority list alang sa funding sa national government.
Ang bana ni congresswoman Dizon miingon nga ang tag-iya sa luna kinsa suod niya nga higala ingon man sa pamilyang Ouano mo donate og 2,000 square meter lot.
“Ang 2,000 square meter lot part ra ni sa iyang (businessman) share sa reclaimed lot. The businessman will donate this to DepEd,” suma ni Dizon diin dugang pa niya ang school building possible mogasto og P800 million to P1 billion.
Dugang pa ni Dizon nga ang mga tinun-an sa highschool sa barangay Paknaan kasamtangan nga nigamit sa mga classrooms sa Paknaan Elementary School. Samtang ang mga silingan nga barangay sama sa Umapad ug Alang-Alang walay mga school building. — /MEL (BANAT NEWS)
- Latest
