Transmission sa solar power abagan sa NGCP

CEBU, Philippines — Ang National Grid Corporation of the Philippines (NGCP) misaad nga motabang aron mapadali ang transmission nga makuha sa 150-megawatt solar power plant sa barangay Talisay sa lungsod sa Daanbantayan.

Mga usa ka kilometro gikan sa tukoran sa maong solar plant nahimutang ang NGCP substation nga maoy modawat sa supply sa koryente gikan sa maong planta.

Ang NGCP usa ka pribadong korporasyon nga maoy gitahasan sa pag-dumala ug pagmintinar sa power grid sa nasud.

Atol sa tigum ni Governor Gwen Garcia ngadto sa mga opisyales sa NGCP niadtong Marso 22 gipasalig niini nga makig-alayon ang probinsiya alang sa maong katuyuan.

 “We will collaborate closely. The sooner they finish the sooner it benefits your business. They will integrate it into your grid,” matud ni gobernador Garcia.

Sa laing bahin ang Cebu Electricity Rights Advocate kon CERA nga gipangulohan sa lead convenor nga si Nathaniel Chua malaumon nga ang mga konsumidor makabaton og patas nga access sa stable, kasaligan og cost effective nga kuryente sa Sugbo.

Kini nonot sa ilang gilusad nga Cebu Electricity Consumer Rights Campaign kagahapon diin ilang tumong mao aron mahatagan og lugar ug partisipasyon ang mga konsumidor pagsusi sa kalidad og gasto sa kuryente nga gihatag ngadto sa mga kunsumidor.

Tinguha ni Chua nga makahimo og grupo una dinhi sa Sugbo aron madungog na unya ang ilang tingog uban sa pakig-alayon pa sa mga eksperto.

Suma sa grupo pinaagi sa ilang statement, nga ang Visayan Electric (VECO), Cebu Electric Cooperative (CEBECO), ug Mactan Cebu Electric Cooperative (MECO) dunay obligasyon sa paghatag og tukma nga supply sa kuryente ngadto sa mga negosyo ingon man sa matag panimalay nga kasaligan ug cost-effective.

Nanawagan usab ang grupo ngadto sa ubang energy players sama sa National Grid Corporation of the Philippines (NGCP), Power Sector Liabilities and Management Corp. (PSALM), Wholesale Electricity Spot Market (WESM), Energy Regulatory Commission ug sa Department of Energy, nga himoon ang ilang tahas pagsiguro nga adunay kasaligan nga supply ug affordable nga kuryente.

Subay niini si Chua, niawhag sa tanang sektoral nga organization sa pag-apil sa ilang kampanya tungod kay ang tanang katawhan apektado man sa pagsaka sa bayranan sa kuryente lakip usab ang pipila ka dapit nga dili stable ang linya sa ilang power supply.  MEL BANAT NEWS