Bahin sa Kapitolyo gikan sa kita sa mga terminal nisaka

CEBU, Philippines — Adunay pagsaka ang bahin sa Probinsiya sa Sugbo gikan sa kita o halin sa pagpatuman sa automated ticketing system sa mga terminal sa probinsiya.

Base sa report sa Kapitolyon nga gikan sa 2 porsyento nahimo na nga 2.5 porsyento ang revenue share o bahin nga alang sa probinsiya.

Ang adjustment sa bahin sa probinsiya magsugod sa Hulyo 1, 2024.

Nahimo ang maong desisyon atol sa tigom sa Economic Enterprise Council karong semanaha diin nitambong niini si Erik Lim, presidente Topline Group nga maoy nag-operate sa automated ticketing system Cebu South Bus Terminal ug Cebu North Bus Terminal.

Sa pagdagsa sa mga pasahero sa mga bus terminal sa probinsiya gilaoman nga makatampo kini sa pagsaka sa halin o bahin sa probinsya diin ang kita gamiton usab alang sa maintenance sa nahisgutang duha ka terminal nga gidumala sa Kapitolyo.

Si Lim nagkanayon nga nipatuman usab sila og mga inisyatiba aron ma-upgrade ug mapalambo ang ilang serbisyo ngadto sa mga pasahero.

Apil sa mga gihimong kalamboan mao ang pagbutang og covered walkway, pagpalambo sa ticketing booths ug pagbutang og mga device aron mahan-ay ang paglukat og ticket hangtud sa boarding sa mga pasahero.   BDB BANAT NEWS