Kalangay sa sweldo sa mga job order nga kawani gikabalak-an

CEBU, Philippines — Pipila sa mga konsehal ang mipadayag sa ilang kabalaka labot sa pagkalangay sa sweldo ug incentives sa mga Job Order (JO) nga mga empleyado bisan pa man sa giaprobahan na nga budget alang sa mga kawani sa Cebu City Government.

Tulo na ka buwan nga wa makadawat sa ilang sweldo ang mga JO sa Cebu City Government, butang nga gikumpirmar nila ni Konsehal Noel Wenceslao, Chairman sa Budget and Finance Committee ug Konsehal Nestor Archival Sr., nga Minority Floor Leader.

Nagkanayon si Wenceslao nga aduna na'y budget gitagana sa sweldo alang sa mga regular, casual ug mga JO employees sa city government.

Nalakip kini sa annual budget sa 2024 nga mokabat og P25 billion. Samtang ang gratuity pay o Charter Day bonus nalakip sa Supplemental Budget (SB) 1 nga gi-approve niadtong Marso 8, 2024 atol sa usa ka special session.

Matud ni Wenceslao mopaubos ang executive department og proseso aron mahatag na ang sweldo ug incentives sa mga JO employees.

Lakip na sab sa budget appropriation ang 4,784 nga casual ug regular samtang 3,357 ang mga JO.

Dugang ni Wenceslao, sigurado nga madawat sa mga JO ang ilang sweldo sa mga milabayng buwan kung ma-renew na ang ilang appointment.

Apan alang sa mga di na ma-renew, di na sila makadawat sa ilang sweldo bisan pa man sa ilang natrabaho sa milabayng mga buwan.

Ipaubos og renewal of appointments ang mga JO employees matag tulo ka buwan sa unom sa buwan. Matud ni Wenceslao, mas nadugay ang proseso tungod sa gipahigayong rightsizing program sa administrasyon nga naglaraw nga minusan ang mga empleyado ngadto sa 3,000 sa tuig 2025.

 Ang makadawat kato rang appointed ones, but the budget appropriation is there already, the budgetary requirement is naa na, but di man sila makadawat kung wala silay appointment,  matud ni Wenceslao.

Sa usa ka lahing interview, usa ka JO employee nga wa magpahingan, mikumpirmar nga tulo na siya ka buwan wa makadawat sa iyang sweldo.

Apan matod niya di na kini bag-o tungod ang mga JO employees, malangay ang sweldo maabtan og tulo ngadto sa upat ka buwan usa makadawat sa ilang sweldo sa di pa ma-renew. (BANAT NEWS)