27 ka responders nga gipaubos sa pagbansay ang nigradwar na
CEBU, Philippines — Hingpit nga nigradwar sa niaging adlaw ang 27 ka responder sa DRRM Basic Emergency Responder Training Course nga gipasiugdahan sa City Disaster Risk Reduction and Management sa Dakbayan sa Lapu-Lapu.
Ang graduation ceremony gipahigayon diha sa hoops dome sa Barangay Gun-ob sa maong siyudad nidtong Lunes diin si Mayor Junard "Ahong" Chan nitambong niini.
Si Chan kinsa chairperson usab sa DRRMO sa siyudad ang nipadayag og mga paghangop niini.
Matud ni Chan nga mahinungdanon kayo ang maong mga pagbansay nga gihimo tungod kay naglambigit kini sa pagpreserba sa kinabuhi sa tawo.
Nunot nini, iyang gipasalamatan ang maong mga responder sa ilang pagsakripisyo sa kapin sa duha ka bulan nila nga pagpaubos og pagbansay.
Naglakip sa gitudlo sa pagbansay ang Rope Rescue, Water Search and Rescue operation, Basic Firefighting ug Basic Patient Assessment.
Nahimong special guest sa maong graduation nga gipahigayon si Director Joel Erestain sa Office of the Civil Defense Central Visayas kinsa nipahalipay usab sa mga responder sa ilang kalamposan sa maong mga pagbansay nga gipahigayon. (BANAT NEWS)
- Latest
