Skywalk ilisan og pedestrian tunnel, “impractical”- Cuenco

CEBU, Philippines — Gihulagway sa Chairman sa Committee on Transportation sa Cebu City Council nga ang katuoyan ni Mayor Michael Rama nga ilisan ang skywalks og pedestrian tunnels usa ka “impractical innovation” ug nidugang nga makaapekto kini sa dynamic sa transportasyon sa dakbayan.

Sa pakighinabi sa The Freeman kagahapon (Domingo), Marso 17, 2024, si Cuenco nagkanayon nga ang mga plano nga ilisan ang skywalk og mga tunnel pedestrian makaapektar sa dagan sa transportasyon karon sa siyudad.

Matud niya nga ang kakuwang sa alternatibong mga rota sa mga sakyanan mahimong moresulta sa paghuot sa trapiko sa higayon nga masugdan na ang pagtukod niini sama sa nakita sa Cebu Bus Rapid Transit (CBRT).

Matud ni Cuenco, ang mga ideya sama sa pedestrian tunnels kinahanglan nga planohon ug tun-an. Dugang pa niya, ang pagkalot sa mga karsada sa dakbayan kinahanglan adunay mga pagtuon sa engineering tungod kay wala pa mahibaw-i unsa ang naa sa ilawom niini.

"It will take years to realize even one tunnel, not to mention how many tunnels are there? 10? So mag build tag ten tunnels? It's really very impractical," matud pa ni Cuenco.

Una niini gipadayag ni Mayor Rama nga tangtangon ang tanang nahibiling skywalk sa dakbayan kay matud pa wala na kini magsilbi sa katuyoan niini ug nahimo na kining puy-anan sa mga informal settlers.

Sa problema sa mga informal settlers nga nag-okupar sa maong lugar, si Cuenco niingon nga masulbad kini pinaagi sa pag monitor sa mga tinugyanan sa balaod sama sa Department of Services (DPS).

Nagbutang usab siya og mga solusyon sama sa pagtudlo og partikular nga mga empleyado nga mu-monitor sa lugar ug sa paggamit sa skywalks.

Gawas niini, ang paglimpyo ug pag-usab sa mga skywalk mahimong mas "praktikal" nga solusyon imbes nga tangtangon kini.

Dugang pa niya, nga aron hingpit usab nga mapahamtang ang monitoring sa nahisgutang mga skywalk, mahimo nga magbutang ug CCTV cameras.

Gawas niini, mahimo usab nga mapasar og usa ka ordinansa diin ang mga probisyon partikular nga magtuki sa pag protekta sa mga skywalk.   “I want to know if the mayor is serious about it. You know these ideas are spur of the moment ba because (ingon niya) sa Melbourne ingon-ani kopyahon na pud," matod ni Cuenco. (BANAT NEWS)