2,000 ka pantiyon sa sementeryo sa Toledo apektado sa road widening

CEBU, Philippines — Nikabat ngadto sa 2,000 ka pantiyon sa pampublikong sementeryo sa Barangay Ibo, Dakbayan sa Toledo ang maigo sa ipahigayon nga road widening project sa Department of Public Works and Highways (DPWH) karong tuiga.

Niadtong unang semana niining buwana ang lokal nga kagamhanan sa siyudad nagsugod na sa pagpahibawo sa mga kaliwat sa mga minahal nilang nitaliwan ngadto sa laing kalibutan nga maapektohan sa maong proyekto.

Ang Toledo Public Cemetery adunay halos usa ka ektarya nga gilapdon ug ang 10 metros niini gikan sa karsada maoy kuhaon sa DPWH alang sa road widening.

Matud ni Pastor Danilo Alonso, administrator sa maong sementeryo nga ang kapin sa 2,000 nitso nga maagian sa maong proyekto ibalihin kini ug adunay 200 niini nga wala pa maabot sa lima katuig nga nalubong.

Si Alonso nibutyag sa Banat News nga kadtong wala kaabot sa lima katuig ipang balhin kini sa bag-ong nitso samtang katong gipanglubong nga lapas sa lima katuig ibalhin sa bone chamber.

Ang mga kaliwat sa mga gipanglubong nga maigo sa proyekto nipadayag sa ilang kabalaka tungod kay adunay bayronon ang pagbalhin sa mga bukog.

Apan ang representate sa DPWH nga si Engineer Miguel Diego Mendez nipasalig nga walay gastohon ang tagtungod sa pagbalhin sa nitso tungod kay apil na kini sa scope of work sa ilang proyekto.

Matud ni Mendez nga ang lokal nga kagamhanan sa siyudad maoy mangita og luna sa ilang kabalhinan.

"Ang mga nitso nga maagian sa road widening project, ang DPWH na ang mo-construct sa ilang kabalhinan", matud ni Mendez atol sa gipahigayon nga meeting diha sa buhatan ni Toledo City Mayor Marjorie Perales niadtong Miyerkules.

Sa pagkakaron adunay kapin sa 200 na ka tagtungod ang ni-contact sa Toledo Public Cemetery.

Nunot niini, si Alonso nanawagan sa mga tagtungod sa pagbisita sa Facebook page sa Toledo PIO aron masuta kong usa sa lubong sa ilang minahal ang anaa sa lista.

Giplano na sa City Engineering Office kauban ang City Planning and Development Office ang pagbisita ug pagbuhat og survey sa maong sementeryo aron masuta ang luna nga balhinan sa mga nitso nga naigo sa maong proyekto. — BDB BANAT NEWS