Chan mihatag sa iyang sweldo isip tabang sa nasunogan

CEBU, Philippines — Si Lapu-Lapu City Mayor Junard "Ahong" Chan mihatag sa iyang sweldo isip pasiunang hinabang sa mga nasunogan sa sitio UTB (Under the Bridge) ug sitio Bantayan sa Hari sa Barangay Looc siyudad sa Mandaue niadtong Martes.

Gipasalig usab sa mayor nga ang kagamhanan sa siyudad sa Lapu-Lapu mohatag og ayuda sama sa tabang pinansyal nga moabot sa usa ka milyon ka pesos.

Unang tabang nga gipadangat sa dakbayan mao ang mga grocery items ingon man pagkaon.

Sa nasayran gatusan ka panimay ang nasunog sa barangay Looc niadtong Martes diin gibana-bana nga naka-apekto sa 700 ka pamilya.

Si Mandaue City mayor Jonas Cortes ang mihatag usab og usa ka milyon ka pesos nga pinansiyal nga ayuda sa mga nasunogan.

Si Mayor Cortes nga gikan pa sa kaulohan ang milahos kini sa Barangay Gym sa Looc nga maoy nagsilbing evacuation center aron sa pagsusi sa ilang kahimtang.

Sa mao niyang pagbisita iyang gipaniguro ang pagpahiluna sa matag pamilya nga nasunogan ug ang pag-atiman sa ilang mga panginahanglanon samtang anaa pa sila sa kaguol.

Samtang ang Kaabag Mandaue nga gipangulohan ni Karla Victoria Cortes ang nagpakaon usab og lome sa mga biktima sa sunog. (BANAT NEWS)