Armado napusilan sa mga polis

CEBU, Philippines — Usa ka lalaking gi-alarma kay naghupot og armas ang napusilan sa mga polis human matud pa misukol diha sa Purok Ubi, Barangay Paknaan sa Mandaue City niadtong adlaw nga Lunes sa kaadlawon.

Si Police Lieutenant Colonel Mercy Villaro, tigpamaba  sa MCPO miingon nga adunay nitawag kanila kabahin sa usa ka armadong lalaki, apan sa pagabot sa mga polis gikatahong gitukmod niini ang polis ug suway mibunot og gituohang hinagiban gikan sa iyang hawak.

Tungod niini, napusilan kini sa abaga ug tiyan. Nakuha gikan kaniya ang usa ka kalibre .45 pistola ug 12 ka gramo nga gituohang shabu. Ang dinakpan gidala sa Mandaue City Hospital. 

Sa pikas bahin, balik sa prisuhan ang ex-convict nga si Arnel Cabellon Ruiz, 31, taga Sitio Kalubihan, Barangay Basak San Nicolas human kini gidakop sa kapulisan sa Mambaling Police Station diha sa Sitio Manggahan, Barangay Basak San Nicolas, Siyudad sa Sugbo,  alas 6:05 sa buntag kagahapon, Marso 12, 2024.

Napriso sa miaging tuig tungod sa drugas ang suspek apan nakagawas dayun pinaagi sa plea bargain.

Apan samtang napriso giilisan siya sa iyahang asawa nga iyaha amigo ra usab sa suspek ug mao unta iyang hulgaon sa maong armas. Nakuha gikan sa dinakpan ang kalibre .38 revolver nga dili lisensyado.

Nadakpan sab sa mga sakop sa Criminal Investigation and Detection Group(CIDG) Lapu-Lapu City Field Unit ang gipasanginlang gunrunner nga 26- anyos nga  si alyas Rey nga taga Anajao, Lungsod sa Argao atol sa entrapment operation diha sa Barangay Mompeller sa mao gihapong lungsod sa miaging adlaw.

Uban sa CIDG Lapu-Lapu City Field Unit ang Argao Municipal Police Station sa pagpahigayon sa Oplan Paglalansag “Omega” nga miresulta sa pagkasikop sa suspek tungod suway niya pagbaligya og armas sa polis nga nagpakaaron ingnon nga buyer.

Nakuha gikan kaniya usa ka kalibre .357 revolver, kwarta ug cellphone. IBM BANAT NEWS