Kapolisan sa Talisay nakadawat og 18 ka reklmo sa kababayen-an ug kabataan

CEBU, Philippines — Niabot na ngadto sa 18 ka reklamo o kaso gikan sa kababayen-an ug kabataan ang nadawat sa kapolisan sa Dakbayan sa Talisay sulod sa duha ka buwan karong tuiga.

Nasayran nga mas taas ang ilang natala karong tuiga kong ikompara sa niaging tuig nga anaa lang kini sa 17 ka kaso ug 18 ka kaso sa tuig 2022. bSi Police Lieutenant Colonel Wayne Magbanua, hepe sa kapolisan sa Dakbayan sa Talisay nagkanayon nga nagpamatuod lang kini nga epektibo ang ilang pag-awhag sa kababayen-an ug kabataan sa pagreklamo kong makamatikod nga giabuso na kini.

Ang grupo sa Women and Children Protection Desk (WCPD) sa siyudad padayon ang pagbisita sa kabarangayan ug gitudloan ang kababayen-an ug kabataan sa ilang mga katungod ug kanos-a kini mosumbong sa otoridad.

Ang buwan sa Marso gisaulog nga women’s month diin nagkadaiyang tunghaan ang gituyo sa pagbisita sa kapolisan aron hatagan og mga symposium.

Gihulagway nga sa pagkuyanap sa ginadiling drugas mas daghan ang kababayen-an ug kabataan ang nabiktima sa pagpangabuso. BDB BANAT NEWS