Mga junior police sa Talisay nitabang sa seguridad sa tunghaan

CEBU, Philippines — Padayon na nga nagbantay o nitabang sa paghatag og seguridad sa mga tinun-an ug magtutudlo ang junior police sa Talisay City National High School.

Niadtong buwan sa Disyembre sa nilabay’ng tuig gisugdan sa pag-umol ang maong grupo.

Gipaubos sila og mga training ug seminar aron hingpit na nga mahimong junior police ang mga tinun-an. Si Reynaldo Cabusas, Jr., junior police coordinator nibutyag nga ang mga sakop sa junior police niagi kini sa mga training nga gilangkuban sa military training, intelligence monitoring ug mga traffic rules.

Gihimo kini aron sa paghatag og disiplina sa mga tinun-an sa sayo nga pangedaron.

Sila ang katambayayong sa mga gwardiya ug magtutudlo sa paghatag og seguridad sa ilang tunghaan.

Matud ni Negrido Crislee, supreme secondary learner government adviser nga boluntaryo ang mga tinun-an sa pag-apil sa junior police.

Ilang gisiguro nga samtang niapil sila sa junior police dili maapektohan ang ilang pagtuon.

Nilangkub ang ilang grupo sa 13 ka estudyante kinsa kasagaran sa pioneer anaa na sa grade 12 apan bukas kini sa tanang grade level. Usa si Jenny Rose Tumulak nga apil sa junior police diin nangandoy nga mamahimong polis sa umaabot.

Matud ni Tumulak nga gitudloan sila sa pagdisiplina sa kaugalingon ug hinumdoman ang ilang responsibilidad.

Sa laing bahin, duha ka semana nalang sa dili pa ang pagsaulot sa Semana Santa ug nunot niini ang kapolisan sa Probinsiya sa Bohol subsob na ang gihimong pagpangandam aron masiguro nga luwas ug hapsay nga mapahigayon ang mga kalihokan sa Semana Santa.  Matud ni Police Lieutenant Colonel Norman Nuez, tigpamana sa Bohol Police Provincial Office (BPPO) nga duna sila’y security plan alang sa Semana Santa.

Gipalig-on nila ang ilang seguridad sa border control sa mga nag-unang pantalan sa probinsiya sama sa Tagbilaran, Loon, Tubigon, Getafe, Talibon, Ubay ug Jagna.

Apil usab sa hugot nga gibantayan sa kapolisan sa Probinsiya sa Bohol ang Panglao International Airport diin sa pagpatunhay sa kahapsay ug kalinaw sa mga pantalan ug tugpahanan nakig-alayon sila sa ubang ahensiya sa gobiyerno.

Gawas niini, gipalig-ayon usab sa BPPO ang border control sa matag munisipalidad kini subay sa kamandoan ni Police Brigadier General Anthony Aberin, director sa Police Regional Office-7 kini aron mahatagan og seguridad ang kadalanan ilabi na nga daghang turista ug mga magpapatigayon sa lalawigan. — /BDB (BANAT NEWS)