Facebook page sa Bohol Police Provincial Office na hack

CEBU, Philippines — Na-hack ang Facebook Page sa Bohol Police Provincial Office(BPPO) diin ang makita nga ang mga post pulos nalang mga salida.

Suma pa ni Police Lieutenant Colonel Norman Nuez, tigpamaba sa Bohol Police Provincial Office nga niadtong Pebrero 28, 2024 ilang nabantayan nga na-hack ang ilang Facebook page ug wala na sila'y control niini.

Gisuwayan nila og recover ang ilahang Facebook page apan wala nila nabawi hinungdan nag-request sila sa Facebook pinaagi sa Regional Anti-Cybercrime Unit (RACU) -7 aron ma-recover ang ilang page.

Awhag sa kapolisan sa katawhan nga kung duna may post ang page o kaha naay mo-message dili kini tagdon sanglit wala na sila'y control niini ug padayon ang ilang paningkamot aron mabawi kini gikan sa mga hackers.

Hinoon, walay nadawat nga report ang BPPO nga gigamit ang ilahang page aron makapangilad.

"Wala man hinooy nag report namo pero pag diha-diha dayon nadiskitaan namo wala nami control amo ng gi-report sa Anti-Cybercrime unya amo na gikuanan nga ipa take down, so far sa monitoring namo wala paman hinooy nikuan", sigon ni Lt. Col. Nuez. Una niini, daghan nga mga Facebook pages sa nagkalain-laing ahensiya sa gobyerno ang na-hack usab.