Tourist van vs trak: unom naangol

CEBU, Philippines — Unom ka tawo, lima niini mga turistang Haponese ang nangaangol human nagbangga ang usa ka trailer van truck ug tourist van sa National Road sa Barangay Langtad, Siyudad sa Naga, pasado alas 3 sa kadlawon kagahapon, Marso 9, 2024.

Ang trak gimaneho ni Randy Yoil Lato, 49 anyos, residente sa Cogon Guinsay, Siyudad sa Danao. Nagkarga kini og mga tires sa iyang trailer atol sa hitabo.

Samtang ang van gimaneho ni Baby June Fabillar Limpag, 43 anyos, molopyo sa Barangay Labangon, siyudad sa Sugbo kinsa naangol sa maong hitabo.

Naangol sab sa maong hitabo ang lima ka Japanese nationals nga sakay sa van dihang nahitabo ang aksidente kansang mga pangalan wala pa ibutyag sa kapolisan. Giingong dunay 13 ka mga turista ug usa ka tour guide ang sakay sa maong tourist van.

Subay sa imbestigasyon sa Naga Police Station, giingong padung sa Lungsod sa Oslob ang van sakay ang mga turistang Hapon.

Pag-abot sa dapit, matod pa kalit nga ni-left turn ang trak hinungdan nga nibangga niini ang van.

Nasayran nga matag kaadlawon, daghang mga tourist vans ang mangadlawon padung sa Oslob aron makaabot sa ‘cut-off’ sa whale shark watching sa maong lugar nga popular sa mga turista.

Dali hinuong gidala sa tambalanan ang mga naangol, samtang ang driver sa trak ang gikustodiya na sa Naga Police Station.

Sa pikas bahin, kapin sa 100 porsiyento ang pagsaka  sa mga  nahitabong aksidente sa Siyudad sa Mandaue sulod lang sa unang duha ka bulan sa tuig 2024 kon itandi sa unang duha ka bulan saa tuig 2023.

Kini base usab sa natala  sa buhatan sa Traffic Enforcement Agency of Mandaue (TEAM)  nga miingon nga nag-una sa mga nalambigit sa aksidente mao ang motorsiklo.

Subay sa  natala  sa buhatan sa TEAM nga sa bulan sa Enero hangtod sa Pebrero 2024   miabot gayod sa 1,683 samtang sa tuig 2023 sa  maong unang duha ka bulan niini 787  lamang ang natala  nga aksidente.

Sa matang sa mga sakyanan nga nalambigit og aksidente maoy nag-una ang motorsiklo nga adunay  690 nga gisundan sa SUV nga sakyanan nga adunay 236  ka mga nahitabong aksidente ug ang Sedans nga sakyanan  anaa lamang sa 163 ka mga nahitabong nga aksidente.

Samtang ang taxi ang nakatala lamang 99 ka mga nahitabong aksidente ug 92  usab ang naglambigit sa pickup truck nga matang sa mga sakyanan.

Si  Hyll  Retuya,  assistant department head sa TEAM  miingon nga sa kasamtangan ilang gihinusgan karon ang ilang checkpoint operations alang sa pagsikop niadtong mga drayber nga traffic violator nga maoy hinungdan nga mahitabo ang panabangga.

Dugang pa ni Retuya higpit nga gihimo nila  karon  ang higpit nga pagbantay sa mga dalan nga accident-prone areas nga naglakip sa dalan JP Rizal, ML Quezon sa Barangay Cabancalan, A.S. Fortuna  sa  Banilad, ug DM ug AC Cortes Avenue sa Barangay Cambaro. (BANAT NEWS)