CSBT gusto ni Rama ibalhin sa SRP

CEBU, Philippines — Si Cebu City Mayor Michael Rama nipadayag og balik kabahin sa pagbalhin sa Cebu South Bus Terminal (CSBT) ngadto sa South Road Properties (SRP) aron pagpaluag sa kahuot sa trapiko sa dakbayan. Sa usa ka online interview kagahapon (Huwebes), si Rama miingon nga kinahanglang wala nay terminals sa tungatunga sa siyudad.

All of these are being talk about kanang mga bus in the meantime tuyok na sa Cebu City, ayaw lang butangi og terminal. Kay inig abot sa terminal modiretso na og padung sa terminal maggawas na sa terminal, unsa may mahitabo?,  matud niya.

Matud ni Rama, ang dakbayan sa Sugbo napuno na sa mga terminal.

Gikataho nga gusto ni Rama nga ibalhin ang CSBT aron mahatagan og dalan ang katukoran sa Cebu Bus Rapid Transit (CBRT). Apan ang chairman sa Committee on Transportation sa City Council nga si Konsehal James Anthony Cuenco nagkanayon nga dili ingon ana kadali ang pagbalhin sa CSBT.

Dili sab sakto sa tayming ang panawagan kay init pa ang panaglalis sa mga lider sa dakbayan ug sa probinsiya nunot sa isyu sa Cebu Bus Rapid Transit nga gipahunong sa ni Gob. Gwendolyn Garcia.

Sa pakighinabi kagahapon (Huwebes), si Cuenco miingon nga bisag duna nay nakitang kabalhinan sa CSBT, kinahanglan pang magkauyon ang mga opisyal sa Cebu City ug sa Probinsiya sa Sugbo bahin ani. Dugang pa niya, nga karong panahona bisan og mandoan sila ni Rama nga mopasar og ordinansa nga magtukod og terminal sa SRP, ang pangutana kun mouyon ba ang probinsiya nga duna man silay territorial authority sa CSBT.

So it is easier said than done, and we cannot do it in one day there are a lot of dynamics that need to be addressed,  matud ni Cuenco.

Matud ni Cuenco, kinahanglan una nga himuon ang usa ka dialogue sa dili pa ang enactment sa maong plano, apil sa tukion ang mg rerouting sa mga rota sa maapektahang mga pasaheroan.

Let us talk like responsible adults and consult the experts,  matud ni Cuenco. (BANAT NEWS)