PRO-7: NegOr usa sa mga luwas nga lugar

CEBU, Philippines — Ang Probinsiya sa Negros Oriental usa sa mga luwas ug hapsay nga lugar human sa nilabay nga usa ka tuig sa nahitabong massacre nga nikalas sa kinabuhi ni kanhi gobernador Roel Degamo ug laing siyam ka tawo.

Nasayran nga wala mohunong ang Police Regional Office (PRO)-7 sa paggukod sa mga miyembro sa Private Armed Groups aron dili sila makabalda sa kalinaw ug kahapsay sa probinsiya.

Si Police Lieutenant Colonel Gerard Ace Pelare, tigpamaba sa PRO-7 nibutyag nga sa Private Armed Groups nga ilang na-identify kaniadto 29 kabuok ang ilahang miyembro apan karon siyam nalang kini ug kasagaran kanila ang wala na sa Pilipinas.

“Although naa to’y mga warrants and uban, the warrants of arrest that’s why I’m saying nga we are methodically neutralizing the Private Armed Group in Negros, in fact we have not reported any atrocities perpetrated by these Armed Groups for so long time already”, matud ni Pelare.

Niadtong Marso 4, 2023 dihang nahitabo ang pagpatay kang Degamo diha sa panimalay niini sa Lungsod sa Pamplona diin sobra sa 20 ka tawo ang gipangita sa mga otoridad nga kauban sa paghimo sa krimen.

Samtang dili lang Private Armed Groups ang gihatagan og pagtagad sa kapolisan apil usab ang presensiya sa Communist Terrorist Group sa Negros Oriental.

Matud ni Pelare nga dili na sama kaniadto ang kalig-on sa pwersa sa mga terorista sa lalawigan tungod kay remnants nalang ang mga nahibilin ug malaumon ang kapolisan nga sa dili madugay ma-insurgency free na ang Negros Oriental.

Nasayran nga nagpabilin ang pwersa sa kapolisan ingon man kasundalohan sa Negros Oriental nga maoy nagmentinar sa kahapsay ug kalinaw sa probinsiya. BDB BANAT NEWS