Duha angol sa sunog sa barangay Labogon sa Mandaue

CEBU, Philippines — Duha ka tawo ang naangol sa nahitabong sunog Domingo sa kadlawon diha sa Fatima Road sitio Chicos, Barangay Labogon, siyudad sa Mandaue.

Sa taho sa kabomberohan sa Mandaue City Fire Station nga gipangulohan ni Fire Marshal Supt. Arnel Abella ang sunog nahitabo alas 4:52 ug naglambigit sa panimay nga gipanag-iya ni Fortunato Managbanag.

Gibutang sa kabomberohan nga under control alas 5:13 sa buntag og hingpit na nga napawong alas 5:15.

Way gikatahung nakalas sa sunog apan dunay duha nga naangol nga mao sila si Jimrod Bica nakabaton og pangos sa iyang tuhod samtang si Zophia Chua nakaangkon og samad sa iyang wala ug tuong kamot.

Mokabat sa P156,000.00 ang gibilin nga danyos ug gisusi pa sa kabomberohan ang hinungdan sa pag-ulbo sa sunog. (BANAT NEWS)