Lumad Basakanon ipada alang sa Kadayawan Festival sa Davao

CEBU, Philippines — Ipadala ni Cebu City Mayor Michael Rama ang Lumad Basakanon sa Barangay Basak San Nicolas ngadto sa Kadayawan Festival sa siyudad sa Davao karong buwan sa Agosto.

Ang mayor nitug-an nga iya nang gipahibalo si Davao City Mayor Baste Duterte sa pag-apil sa dakbayan atol sa pagbisita niini sa siyudad sa Sugbo alang sa prayer rally niadtong Domingo.

Samtang gipadayag usab ni Rama ang iyang imbitasyon ngadto kang mayor Duterte alang sa pagsalmot usab niini sa Sinulog Festival sa sunod tuig. 

Nagtinguha ang mayor nga mopatawag og meeting sa mga opisyal sa city hall aron tukion ang maong pag apil nila sa Kadayawan.

Sa nasayran ang Lumad Basakanon unang nakasud sa Hall of Fame sa Aliwan Festival, sa national competition of festivals tibuok Pilipinas.

Niadtong tuig 2017, ang grupo nakabaton og international recognition human modaug isip third place sa World Wonju Dynamic Dance Festival sa Wonju, South Korea.

Nagplano usab si mayor Rama nga imbitaron nga mopadala og delegado alang sa Sinulog sa Sugbo ang mga sister city sa siyudad sa Sugbo.— MEL BANAT NEWS