School for sports, gitinguha sa siyudad alang sa mga atleta

CEBU, Philippines — Giklaro ni Konsehal Donaldo Hontiveros nga ang tumong nga mahimo isip satellite school sa National Academy for Sports (NAS) ug maghatag ug scholarship sa mga atleta maoy gitan-aw nga long-term plans sa pagpangayo og dugang P205 milyones nga budget para sa Palarong Pambansa.

Samtang ang executive department sa Cebu City government nangayo ug dugang pondo nga P205 milyones dugang pa sa giaprobahan nga budget nga P200 milyones, si Hontiveros miingon nga adunay mga long-term plans ang gitan-aw human ang pag-host sa Palaro.

Matud ni Hontiveros, ang kasamtangang NAS anaa gibutang sa Clark sa Tarlac City.

“So imagine, by constructing this facility nato diri…right after kahibaw ta maka present ta sa NAS..we can be satellite school for Sports sa Abellana, nga ang bata nga in the future para sa national games, di na sila moadto sa Manila,” sigon ni Hontiveros.

Gikataho nga ang executive department sa Cebu City Government nangayo og dugang P205 milyones nga budget alang sa pag-host sa Palarong Pambansa 2024 alang infrastructure development Matud ni Hontiveros, lakip sa budget ang P23 million alang sa pagtaod og LED outdoor field lights. Magamit sab kini sa uban nga venue ilabi na sa gabii.

Lakip na niini ang pagtaod ug pagtukod sa digital ug visual LED display nga nagkantidad og P135 million. Nalakip usab sa budget proposal ang pagpalapad sa Cebu City Sports Center (CCCS) nga nagkatidad og P47 million.

 Sa maong mga kalambuan, si Hontiveros niingon nga kini makapataas sa integridad sa sports scene sa Visayas diin ang mga student-athletes adunay kaugalingon nga pasilidad kon sila mag-training.

“Kay mao man sad na among i bid puhon nga muduol ta sa NAS nga ang LGU naay pasilidad nga mahimong boarding lodging sa mga athletes,” matud ni Hontiveros.

Si Hontiveros, kinsa usa usab ka kanhi atleta, niingon nga sa ilang panahon kun gusto nilang mosalmot sa national level, kinahanglang mobiyahe pa sila sa Manila alang sa tryouts.

Ang dugang budget proposal alang sa Palarong Pambansa hosting lakip sa Supplemental Budget 1 nga gipaabot nga maabot sa konseho sa dakbayan karong Miyerkules.  BANAT NEWS