Rama: Gipangitaan og solusyon ang problema sa trapiko

CEBU, Philippines — Gipasalig ni Cebu City Mayor Michael Rama nga gipangitaan na og solusyon ang problema sa trapiko sa dakbayan ilabi na ang nahitabo diha sa South Road Properties (SRP) niining ulahi lang nga dili na masubli pa.   

Base sa report sa Sugboanon Channel, si Rama  nibutyag nga nakigtagbo siya sa Traffic Management Council (TMC), Cebu City Administrator Collin Rossel ug uban pang mga ahensiya human sa nahitabong insidente diha sa SRP.

Matud ni Rama nga gihatagan niya og kagawasan ang maong mga departamento sa pagpangita og kasulbaran sa nahisgutang problema.

Ug dili lang ang solusyon sa trapiko ang ilang giplanohan lakip na ang mga proactive measure automatic initiatives gamit ang artificial intelligence (AI). Si Rama nagkanayon nga mao kini ang mga lakang aron makab-ot ang Singapore-like Melbourne sa Dakbayan sa Sugbo. Sayo pa, pipila na ka resolution ang giaprobahan sa konseho sa siyudad aron sa pagtuki sa problema sa trapiko diha sa SRP nga gipangamahanan ni Konsehal Rey Gealon. Kini human nga naaberiya ang usa ka truck sa Cebu South Coastal Road (CSCR) ug nakamugna og kahuot sa dagan trapiko nga nilanat ngadto sa kapin upat ka oras. Subay niini, gihangyo ni Gealon ang City Legal Office (CLO) pinaagi sa usa ka resolution nga pasakaan og tukmang kaso ang drayber ug tag-iya sa truck. Ug kinahanglang ipaubos sa imbestigasyon ang maong hitabo tungod kay nakaapekto kini sa ekonomiya, negosyo ug sa mga motorista.  BDB BANAT NEWS