Kagamhanan sa siyudad dunay katungod sa MCWD bldg

CEBU, Philippines — Kagamhanan sa dakbayan sa Sugbo nagdumili sa pagsanong sa ultimatum nga gihatag sa sa Metro Cebu Water District MCWD sa pagbiya sa karaan nga MCWD building nga gihimong satellite offices sa Cebu City government.

Sa suwat nga gi-addressed ngadto kang Edgar Donoso, general manager sa MCWD pinetsahan ug February 20, 2024, ang Cebu City government mitubag pinaagi sa City Legal Office ug miklaro nga dili sila motuman sa mando sa MCWD.

Nasayran ang MCWD mihatag og final notice niadtong Enero 22, 2024 nga nadawat sa City Administrator's Office.

Sa maong suwat gimando sa MCWD sa kagamhanan sa dakbayan nga bakantihan ug mopahawa sa building sulod sa 30 ka adlaw, mobayad og abang sa kantidad nga P500,000 apil na ang pag-okopar niini gikan sa Hunyo 1, 2023, tangtangon ang estruktura nga ilang gitukod nga walay maguba, ug moayo ug mobayad sa damage nga maangkon sa edipisyo ug mobayad sa bisan unsang unpaid utilities o billings.

Apan ang tubag sa CLO niklaro nga ang Cebu City maoy adunay legal nga katungod sa maong   propedad.

“There exists no factual and legal basis for the City of Cebu to relinquish its lawful possession over the property,” pagbasa sa tubag sa CLO.

Dugang pa niini nga pinaagi sa MCWD Board Resolution No. 04-067-2023, ang pagpanag-iya sa MCWD Building nabalhin ngadto sa City of Cebu ug ang maong pagbalhin wala gipaubos sa bisan unsang kondisyon.

Segun sa tubag sa CLO walay contract of lease dihang gibalhin sa siyudad ang pagpanag-iya sa propedad subay sa MCWD Board Resolution No. 04-067-2023, gumikan niini walay legal nga basihanan nga mobayad og abang ang dakbayan. —Gikan sa The Freeman, MEL BANAT NEWS