Demolisyon sa skywalks humanon karon semanaha

CEBU, Philippines — Si Cebu City Councilor Jerry Guardo, Chairman sa Committee on Infrastructure mibutyag nga humanon sud sa usa ka semana ang pagtangtang sa duha sa skywalks  sa Osmeña Boulevard padung sa Fuente Osmeña Rotunda.

Si Guardo misusi sa lugar kagahapong adlawa aron pagsaksi sa pagtangtang sa maong mga imprastraktura nga gihulagway nga nakaali sa giugmad nga Cebu Bus Rapid Transit project.

Ang CBRT project gisaway na og maayo sa mga tawo tungod sa kalangay sa paghuman niini. Ang orihinal nga mga petsa sa paghuman niini niadto pang niaging tuig apan hangtud karon bisan ang Phase 1 niini wala pa mahuman.

“Ang directive ni Mayor nga madali ang pag-clear, demolish structure para passable na dayon ang traffic, dili na dayon ma inconvenient, dili na ma traffic ang mga tawo,” matud ni Guardo.

Si Engr. Norvin Imbong, Project Manager sa CBRT nagkanayon nga tulo ngadto sa lima ka adlaw dili maagian og sakyanan ang Osmeña Blvd. tungod sa pagguba sa maong skywalks aron walay maaksidente. IBM BANAT NEWS